మాధురీ దీక్షిత్, సోనాలి బేంద్రే ఒకే వేదికపై.. కోన్ హోనార్ క్రోరేపతి గ్రాండ్ ప్రీమియర్

ముంబై : బాలీవుడ్ ప్రేక్షకులను దశాబ్దాలుగా అలరిస్తున్న ఇద్దరు అగ్ర కథానాయికలు మాధురీ దీక్షిత్, సొనాలి బింద్రే తొలిసారి ఒకే స్క్రీన్‌పై కనిపించబోతున్నారు. సోనీ మరాఠీ ఛానల్‌లో ప్రసారమయ్యే ప్రముఖ క్విజ్ షో 'కోన్ హోనార్ కోరోడ్‌పతి' (Kon Honar Crorepati - KHC) సరికొత్త సీజన్ గ్రాండ్ ప్రీమియర్‌తో ఈ అరుదైన కలయిక సాధ్యమైంది. 'ఆతా ఖేల్ బదల్నార్' (ఇకపై ఆట మారబోతోంది) అనే నినాదంతో వస్తున్న ఈ సరికొత్త చాప్టర్‌కు మాధురీ దీక్షిత్ హోస్ట్‌గా వ్యవహరిస్తుండగా, తొలి ఎపిసోడ్‌లో హాట్ సీట్‌లో సొనాలి బింద్రే సందడి చేయనున్నారు.

తమ సుదీర్ఘ సినీ కెరీర్‌లో వీరిద్దరూ కలిసి ఒక్క సినిమాలో కూడా నటించలేదు. అలాంటిది తొలిసారి ఈ బుల్లితెర వేదికపై ఇద్దరూ కలిసి పాత జ్ఞాపకాలను, ఆసక్తికరమైన విషయాలను పంచుకోవడం అభిమానులకు కన్నుల పండుగ కానుంది.

జంతు సంరక్షణ కోసం ఆడుతున్న సొనాలి

సొనాలి బింద్రేకు జంతువులంటే ఎంతో ఇష్టం. అందుకే ఆమె ఈ షోలో గెలుచుకున్న మొత్తాన్ని 'హ్యాపీ పెట్ ఫౌండేషన్' (Happy Pet Foundation) సంక్షేమ కార్యక్రమాలకు అందించనున్నారు. ఈ సందర్భంగా జంతు సంరక్షణ గురించి, తన సొంత 'హ్యాపీ పాడ్‌కాస్ట్' గురించి ఆమె పలు విషయాలను పంచుకున్నారు. అలాగే ఇల్లు నడపడం, బాధ్యతలను పంచుకోవడం వంటి గృహిణిల సాధారణ విషయాలపై ఇద్దరు స్టార్స్ సరదాగా ముచ్చటించారు. ఈ క్రమంలో తన అత్తగారు తనను వంటగదిలోకి అస్సలు రానివ్వరనే ఆసక్తికరమైన విషయాన్ని సొనాలి బయటపెట్టారు.

నటిగా, హోస్ట్‌గా మాధురిపై ప్రశంసలు

షో సందర్భంగా మాధురీ దీక్షిత్ మాట్లాడుతూ, "సొనాలి, నేను కలిసి ఇప్పటివరకు సినిమా చేయలేదు. కానీ ఎప్పటికీ ఆలస్యం కాలేదు! ఈ రోజు 'కోన్ హోనార్ కోరోడ్‌పతి' సెట్స్‌పై ఇద్దరం కలవడం ఒక పండగలా ఉంది. నా కొత్త ప్రయాణాన్ని నీతో ప్రారంభించడం చాలా ఆనందంగా ఉంది" అని అన్నారు.

దీనికి సొనాలి స్పందిస్తూ, "కోన్ హోనార్ కోరోడ్‌పతి షోకు ఒక మహిళా హోస్ట్ రావడం, అది కూడా మాధురి కావడం కంటే అద్భుతం ఏముంటుంది? నేను ఎప్పటి నుంచో మాధురి అభిమానిని. మా ఇద్దరి పిల్లలు ఒకే స్కూల్‌కి వెళ్తారు కాబట్టి మేం తరచూ కలుస్తుంటాం. కానీ ఇలా స్క్రీన్ షేర్ చేసుకోవడం ఇదే మొదటిసారి. ఆమెలోని ఆత్మీయత నాకు తెలుసు కాబట్టి, తను మంచి హోస్ట్ అవుతుందని ముందే ఊహించాను. ఆమె అద్భుతమైన నటి, డ్యాన్సర్. సెట్స్‌లో ఆమె డ్యాన్స్ చేయడం చూసి మురిసిపోయాను. ఎవరైనా రైటర్స్ మా ఇద్దరినీ దృష్టిలో పెట్టుకుని మంచి కథ రాస్తే, కలిసి సినిమా చేయడానికి నేను సిద్ధం" అని చెప్పుకొచ్చారు.

నానా పటేకర్ మృతితో మారిన షెడ్యూల్

నిజానికి ఈ గ్రాండ్ ప్రీమియర్ ఎపిసోడ్‌ను ప్రముఖ నటుడు నానా పటేకర్తో ప్లాన్ చేశారు. 1998లో వచ్చిన 'వజూద్' సినిమాలో మాధురి, నానా పటేకర్ కలిసి నటించారు. శనివారం (నేడు) ఈ షూటింగ్ జరగాల్సి ఉంది. కానీ నానా పటేకర్ ఆకస్మిక మరణంతో ఈ ఎపిసోడ్ క్యాన్సిల్ అయింది. ఆయన మృతికి మాధురీ దీక్షిత్ ఇన్‌స్టాగ్రామ్ వేదికగా సంతాపం తెలుపుతూ.. "ఒక గొప్ప నటుడు, శక్తివంతమైన వ్యక్తిత్వం, ఎప్పటికీ మరువలేని స్వరం.. నానా పటేకర్ మరణంతో చిత్ర పరిశ్రమ ఒక దిగ్గజాన్ని కోల్పోయింది" అని నివాళులర్పించారు.

నానా పటేకర్ హఠాన్మరణంతో ఈ గ్రాండ్ ప్రీమియర్ ఎపిసోడ్‌కు సొనాలి బింద్రే ముఖ్య అతిథిగా విచ్చేశారు. రాబోయే రోజుల్లో మరికొందరు మహారాష్ట్ర ప్రముఖులు ఈ షోలో సందడి చేయనున్నారు.

ఎన్నో భావోద్వేగాలు, అరుదైన కలయికలు, సామాజిక దృక్పథంతో ప్రారంభం కానున్న ఈ ఎంటర్‌టైనింగ్ ఎపిసోడ్‌ను మిస్ అవ్వకుండా చూడాలంటే.. అక్టోబర్ 12, సోమవారం రాత్రి 9 గంటలకు సోనీ మరాఠీ లేదా సోనీ లివ్ (Sony LIV) యాప్‌లో వీక్షించవచ్చు.