Mahesh Babu: రాముడి గెటప్‌లో మహేష్ బాబు.. సోషల్ మీడియాను షేక్ చేస్తున్న ఫోటో!

Mahesh Babu: టాలీవుడ్‌లో అత్యంత ప్రతిష్టాత్మకంగా తెరకెక్కుతున్న చిత్రాల్లో సూపర్ స్టార్ మహేష్ బాబు, ట్రెండ్ సెట్టర్ దర్శకుడు ఎస్.ఎస్. రాజమౌళి కాంబినేషన్ సినిమా ఒకటి. ఈ సినిమా అనౌన్స్ చేసినప్పటి నుంచే అటు అభిమానుల్లో, ఇటు సాధారణ ప్రేక్షకుల్లో అంచనాలు ఆకాశాన్ని తాకాయి. ఇంకా టైటిల్ కూడా అధికారికంగా ప్రకటించకముందే, ఈ సినిమాకు 'వారణాసి' అనే పేరు పరిశీలనలో ఉందనే ప్రచారంతో ఇండస్ట్రీ వ్యాప్తంగా భారీ క్రేజ్ ఏర్పడింది. ఈ క్రమంలోనే తాజాగా సామాజిక మాధ్యమాలలో ఒక ఫోటో బయటకు వచ్చి నెట్టింట ఊహించని రేంజ్‌లో హల్‌చల్ చేస్తోంది. ఒక సినిమా షూటింగ్ సెట్ లోపల రాత్రి పూట తీసినట్లుగా ఉన్న ఆ ఫోటోలో మహేష్ బాబు ఏకంగా శ్రీరాముడి గెటప్‌లో కనిపిస్తుండటం అందరినీ ఆశ్చర్యానికి గురిచేస్తోంది.

వైరల్ అవుతున్న ఆ ఫోటోను నిశితంగా గమనిస్తే.. చుట్టూ లైట్లు, కెమెరాలతో కూడిన ఒక పెద్ద షూటింగ్ సెట్ కనిపిస్తోంది. దాని మధ్యలో మహేష్ బాబు ఒంటిపై పసుపు రంగు సాంప్రదాయ వస్త్రాలు ధరించి, వెనుక బాణాలు పెట్టుకునే అమ్ములపొదతో చాలా గంభీరంగా నిలబడి ఉన్నారు. లాంగ్ హెయిర్, గడ్డంతో ఉన్న సూపర్ స్టార్ సరికొత్త రూపం చూసి అభిమానులు పండగ చేసుకుంటున్నారు. సామాజిక మాధ్యమాలలో ఈ ఫోటో అడుగుపెట్టిన క్షణాల్లోనే వేల సంఖ్యలో షేర్లు, లైకులతో దూసుకుపోతోంది. మహేష్ బాబు కటౌట్‌కు రాముడి రూపం పర్‌ఫెక్ట్‌గా సెట్ అయిందంటూ నెటిజన్లు కామెంట్ల వర్షం కురిపిస్తున్నారు.

అయితే, ఈ ఫోటో బయటకు వచ్చినప్పటి నుండి దీని చుట్టూ రకరకాల చర్చలు నడుస్తున్నాయి. ఇది నిజంగానే రాజమౌళి సినిమా షూటింగ్ సెట్ నుండి ఎవరైనా రహస్యంగా తీసి లీక్ చేసిన ఫోటోనా?.. లేక మహేష్ బాబును ఇలా చూడాలని ఆశపడే కొందరు ఉత్సాహవంతులైన అభిమానులు ఆర్టిఫిషియల్ ఇంటెలిజెన్స్ (AI) సాంకేతికతను ఉపయోగించి సృష్టించిన నకిలీ ఫోటోనా? అనే అనుమానాలు వ్యక్తమవుతున్నాయి. ఎందుకంటే రాజమౌళి తన సినిమాల విషయంలో చాలా జాగ్రత్తగా ఉంటారు. సెట్‌లోకి ఎవరినీ ఫోన్లు రానివ్వరు. అలాంటిది ఇంత పెద్ద లీక్ ఎలా సాధ్యమనే ప్రశ్నలు కూడా వస్తున్నాయి. ఏది ఏమైనా, మహేష్ బాబును ఇలాంటి ఒక దైవికమైన, పవర్‌ఫుల్ రూపంలో చూడటం మాత్రం ఫ్యాన్స్‌కు అస్సలు ఊహించని ఒక పెద్ద సర్‌ప్రైజ్ అని చెప్పక తప్పదు.

గతంలో కూడా ఈ సినిమా కథకు సంబంధించి ఇండస్ట్రీ సర్కిల్స్‌లో ఒక ఆసక్తికరమైన ముచ్చట నడిచింది. ఈ చిత్రంలో రామాయణానికి లేదా శ్రీరాముడికి సంబంధించిన ఒక ముఖ్యమైన ఘట్టం ఉంటుందని, అందులోనే మహేష్ బాబు కొద్దిసేపు ఇలాంటి గెటప్‌లో కనిపిస్తారని జోరుగా ప్రచారం సాగింది. ఇప్పుడు దానికి తగ్గట్టే ఈ ఫోటో కూడా తోడవడంతో ఆ వార్త నిజమేనని నమ్ముతున్నారు. జక్కన్న మార్కు బ్రహ్మాండమైన విజువల్స్, అడ్వెంచర్ ఎలిమెంట్స్‌తో రాబోతున్న ఈ సినిమా గురించి ఎలాంటి చిన్న అప్‌డేట్ వచ్చినా అది సంచలనంగా మారుతోంది. ఈ లీక్డ్ ఫోటోతో సినిమాపై ఉన్న అంచనాలు నెక్స్ట్ లెవెల్‌కు చేరుకున్నాయి. ప్ర‌స్తుతం ఈ క్రేజీ పిక్ నెట్టింట హంగామా సృష్టిస్తోంది.