Malavika Mohanan: సోషల్ మీడియాలో మాళవిక మోహనన్‌కు మంచి క్రేజ్, భారీ ఫాలోయింగ్ ఉన్నప్పటికీ.. ఆమె సినీ కెరీర్ మాత్రం ఆశించిన స్థాయిలో ముందుకు సాగడం లేదు. ఆమె నటించిన సినిమాలు బాక్సాఫీస్ వద్ద పెద్దగా ప్రభావం చూపకపోవడంతో ఇప్పటికీ ఓ భారీ కమర్షియల్ హిట్ కోసం ఎదురుచూడాల్సిన పరిస్థితి నెలకొంది. అందం, అభినయం, స్క్రీన్ ప్రజెన్స్‌తో మంచి గుర్తింపు తెచ్చుకున్నప్పటికీ.. ఆ క్రేజ్‌ను విజయాలుగా మలచడంలో మాత్రం మాళవికకు ఇప్పటివరకు అదృష్టం కలిసిరాలేదు.

టాలీవుడ్‌లోకి ప్రభాస్ సరసన ‘ది రాజా సాబ్’ సినిమాతో మాళవిక మోహనన్ అడుగుపెట్టింది. ఈ సినిమాతో తెలుగు ప్రేక్షకులపై బలమైన ముద్ర వేయాలని ఆమె భావించింది. భారీ అంచనాల మధ్య ఈ ఏడాది జనవరిలో విడుదలైన ఈ చిత్రం బాక్సాఫీస్ వద్ద నిరాశపరిచింది. సినిమా ఫలితం ప్రతికూలంగా ఉండటంతో టాలీవుడ్‌లో మాళవికకు పెద్దగా కొత్త అవకాశాలు కూడా రాలేదు. దీంతో తెలుగు అరంగేట్రం ఆమెకు ఆశించిన స్థాయిలో ఉపయోగపడలేకపోయింది.

ఇప్పుడు మరో ప్రతిష్టాత్మక చిత్రంతో మాళవికకు ఎదురుదెబ్బ తగిలింది. తమిళ స్పై థ్రిల్లర్ ‘సర్దార్ 2’ గత వారాంతంలో ప్రేక్షకుల ముందుకు వచ్చింది. ఇందులో మాళవిక కథానాయికగా నటించడంతో పాటు స్పై పాత్రలో కనిపించింది. తొలి భాగం మంచి విజయాన్ని సాధించడంతో సీక్వెల్‌పై భారీ అంచనాలు నెలకొన్నాయి. అయితే ఆ అంచనాలను అందుకోవడంలో ‘సర్దార్ 2’ విఫలమైంది. తమిళంతో పాటు తెలుగు మార్కెట్‌లోనూ సినిమా ఆశించిన స్థాయిలో వసూళ్లు సాధించలేకపోయి కమర్షియల్ డిజాస్టర్‌గా నిలిచింది.

ఒకే ఏడాదిలో రెండు హైప్రొఫైల్ సినిమాలు బాక్సాఫీస్ వద్ద విఫలమవడంతో మాళవిక మోహనన్‌కు 2026 ఇప్పటివరకు నిరాశాజనకంగానే మారింది. సోషల్ మీడియాలో ఉన్న పాపులారిటీ, మంచి స్క్రీన్ ప్రజెన్స్ ఉన్నప్పటికీ.. ఆమె కెరీర్‌ను మరో స్థాయికి తీసుకెళ్లే భారీ కమర్షియల్ హిట్ మాత్రం ఇంకా దక్కలేదు. మరి రాబోయే సినిమాలతోనైనా మాళవిక తన అదృష్టాన్ని మార్చుకుంటుందా అనేది చూడాలి.

Tags: