Megastar Chiranjeevi Shares: తెలుగు సినిమా భీష్మాచార్యుడు.. సింగ్ గీతం పై మెగాస్టార్ చిరంజీవి క్రేజీ పోస్ట్

Megastar Chiranjeevi Shares: తెలుగు సినిమా హిస్టరీలోనే కాదు.. ఇండియన్ సినిమా హిస్టరీలోనే ఆయనొక అపూర్వ సృష్టి! ప్రయోగాలకు కేరాఫ్ అడ్రస్ అయిన ఆ లెజెండరీ డైరెక్టర్.. వయసు కేవలం నంబర్ మాత్రమే అని నిరూపిస్తూ, 94 ఏళ్ల వయసులో మరో అద్భుత ప్రయోగానికి తెరలేపారు. ఆయనే సింగీతం శ్రీనివాసరావు! ఆయన దర్శకత్వంలో, ఈతరం క్రేజీ డైరెక్టర్ నాగ్ అశ్విన్ నిర్మాణంలో వస్తున్న వినూత్న చిత్రం... 'సింగ్ గీతం' (SingGeetham). జూన్ 12న ఈ సినిమా ప్రేక్షకుల ముందుకు రాబోతున్న తరుణంలో, చిత్ర యూనిట్‌కు మెగాస్టార్ చిరంజీవి ప్రత్యేక శుభాకాంక్షలు తెలిపారు.

ఈ సినిమాపై సోషల్ మీడియా వేదికగా స్పందించిన మెగాస్టార్ చిరంజీవి... సింగీతం శ్రీనివాసరావు గారిని తెలుగు సినిమా పరిశ్రమకు "భీష్మాచార్యుడు" అని కొనియాడారు. "సింగీతం గారు టాలీవుడ్‌కు ఒక ఆస్తి, ఒక నిధి. దర్శకుడిగా ఎన్నో క్లాసిక్ సినిమాలు అందించడమే కాకుండా, ఎంతోమంది కళాకారుల జీవితాలకు మార్గదర్శకుడయ్యారు. అలాంటి మహోన్నత వ్యక్తి చేసిన ఈ ప్రయోగం ఇండియన్ సినిమాలో మరో మైలురాయిగా నిలవాలి" అని చిరంజీవి ఆకాంక్షించారు. అలాగే, ఇలాంటి పెద్దలను గౌరవిస్తూ, వారి అనుభవాన్ని కొత్తతరానికి అందించాలనే ఆలోచనతో సినిమా నిర్మించిన నాగ్ అశ్విన్‌ను చిరు ప్రత్యేకంగా అభినందించారు. ఆనాటి తరానికి ప్రతినిధిగా నిలిచిన సింగీతం, ఈతరం ఆలోచనలను ప్రతిబింబించే నాగ్ అశ్విన్ కాంబో ఎంతో స్ఫూర్తిదాయకంగా ఉందన్నారు. రాక్‌స్టార్ దేవిశ్రీప్రసాద్ అందించిన సంగీతం ఈ చిత్రానికి మరింత ఎనర్జీ ఇస్తుందని చిరంజీవి తన పోస్ట్‌లో రాసుకొచ్చారు.

అయాన్, అహల్య, శాలిని ప్రధాన పాత్రల్లో నటించిన ఈ 'సింగ్ గీతం' కథ విషయానికి వస్తే... ఇది పూర్తిగా ఒక విభిన్నమైన, వినోదాత్మకమైన కాన్సెప్ట్! ఒక పల్లెటూరిలోని ప్రజలకు ఒక వింత సమస్య ఎదురవుతుంది. కొన్ని అనూహ్య పరిణామాల వల్ల ఆ ఊరి వాసులు మాట్లాడే సాధారణ మాటలన్నీ.. సడన్‌గా పాటలుగా మారిపోతాయి! అవును... ఒకరితో ఒకరు మాట్లాడుకోవాలన్నా సరే, పాట రూపంలోనే పాడాలన్నమాట. ఈ వింత పరిస్థితి వల్ల ఆ గ్రామస్థుల మధ్య ఎలాంటి గందరగోళం నెలకొంది? తమ సమస్యకు వారు ఎలాంటి పరిష్కారం వెతికారు? అనే అంశాలను సింగీతం గారు తన మార్క్ హ్యూమర్‌తో, అత్యంత వినోదాత్మకంగా వెండితెరపై ఆవిష్కరించారు.