Nandamuri Balakrishna & Koratala Siva: బాలయ్య-కొరటాల మాస్ జాతర.. NBK 112 అఫీషియల్ ఎనౌన్స్‌మెంట్..

Nandamuri Balakrishna & Koratala Siva: నందమూరి అభిమానులు ఎప్పుడెప్పుడా అని ఎదురుచూస్తున్న భారీ క్రేజీ కాంబినేషన్ పట్టాలెక్కింది. గాడ్ ఆఫ్ మాసెస్ బాలకృష్ణ, సక్సెస్‌ఫుల్ డైరెక్టర్ కొరటాల శివ కలయికలో సినిమా రాబోతున్నట్లు ఎట్టకేలకు అధికారిక ప్రకటన వెలువడింది. NBK 112గా రూపొందనున్న ఈ చిత్రం టాలీవుడ్‌లో సరికొత్త సంచలనానికి తెరలేపనుంది. ఈ సినిమా ప్రకటన సందర్భంగా విడుదల చేసిన కొటేషన్ ఇండస్ట్రీలో హాట్ టాపిక్‌గా మారింది. అధికారానికి ఉద్దేశం తోడైతే.. అది ఉద్యమంగా మారుతుంది అంటూ టీమ్ సోషల్ మీడియాలో పోస్ట్ చేసింది. కొరటాల శివ మార్కు సామాజిక సందేశంతో పాటు బాలయ్య బాబు రేంజ్ మాస్ యాక్షన్ ఎలిమెంట్స్ ఈ సినిమాలో పుష్కలంగా ఉండబోతున్నాయని ఈ డైలాగ్ స్పష్టం చేస్తోంది.

షూటింగ్ ఎప్పుడు?

ప్రస్తుతం కొరటాల శివ స్క్రిప్ట్ వర్క్ మొత్తం పూర్తి చేశారని, త్వరలోనే రెగ్యులర్ షూటింగ్ ప్రారంభం కానుందని చిత్ర యూనిట్ వెల్లడించింది. బాలకృష్ణ ఇమేజ్‌కు తగ్గట్టుగా ఒక పవర్‌ఫుల్ పాత్రను కొరటాల డిజైన్ చేసినట్లు సమాచారం. మరోవైపు బాలకృష్ణ ప్రస్తుతం గోపీచంద్ మలినేని దర్శకత్వంలో తన తదుపరి ప్రాజెక్ట్ లో బిజీగా ఉన్నారు. వీరసింహారెడ్డి వంటి బ్లాక్ బస్టర్ తర్వాత వీరిద్దరి కలయికలో వస్తున్న ఈ సినిమాపై కూడా భారీ అంచనాలు ఉన్నాయి. ఈ చిత్రంలో బాలయ్య సరసన నయనతార కథానాయికగా నటిస్తున్నట్లు టాక్ వినిపిస్తోంది.