Raashi Khanna: దిగజారే పాత్రలకు నో.. బాలీవుడ్‌పై దృష్టి పెట్టిన రాశీ ఖన్నా

Raashi Khanna: తెలుగులో ఊహలు గుసగుసలాడే, సుప్రీం, జై లవకుశ, తొలి ప్రేమ వంటి విజయవంతమైన చిత్రాలతో అలరించిన నటి రాశీ ఖన్నా, ప్రస్తుతం టాలీవుడ్‌ కంటే ఇతర భాషా చిత్రాలతోనే ఎక్కువగా బిజీగా ఉన్నారు. తాజాగా, ఆమె తన పాత్రల ఎంపిక గురించి ఆసక్తికర వ్యాఖ్యలు చేశారు. టాలీవుడ్‌లో ఒకప్పుడు వరుస అవకాశాలు దక్కించుకున్న రాశీ ఖన్నా, ప్రస్తుతం తెలుగులో పవన్ కల్యాణ్‌తో కలిసి ఉస్తాద్ భగత్ సింగ్ అనే ఏకైక చిత్రంలో నటిస్తున్నారు. ఇటీవల హిందీలో 120 బహదూర్‌ సినిమాతో ప్రేక్షకులను పలకరించారు. తెలుగులో ఆమె చివరిగా తెలుసు కదా చిత్రంలో నటించారు.

చీప్ పాత్రలకు అంగీకరించను

ఓ ఇంటర్వ్యూలో పాల్గొన్న రాశీ ఖన్నా, తన కెరీర్ ప్లానింగ్ గురించి స్పష్టం చేశారు. ఒక మెట్టు దిగి, తనను చీప్‌గా చూపించే పాత్రలు చేసే ప్రసక్తే లేదని ఆమె తెగేసి చెప్పారు. "దక్షిణాదిన నేను చాలా కమర్షియల్ సినిమాలు చేశాను. అందుకే, హిందీలో మాత్రం ఒక అడుగు ముందుకేసి బలమైన పాత్రలు చేయాలనుకుంటున్నాను. కమర్షియల్ సినిమాలు చేయడం ఇష్టమే, కానీ దానికి కూడా ఒక పరిమితి ఉంటుంది." అని అన్నారు. అంతేకాకుండా "నన్ను చీప్‌గా చూపించే పాత్రలు, నా నిబంధనలను దాటి, నేను మరింత దిగజారిపోయినట్లు కనిపిస్తానంటే మాత్రం, అటువంటి వాటికి నేను వెంటనే నో చెప్పేస్తాను" అని తేల్చి చెప్పారు. తన కెరీర్‌లో నాణ్యతకు, పాత్రల గౌరవానికి ప్రాధాన్యత ఇస్తానని ఆమె పేర్కొన్నారు.