Megastar Chiranjeevi : పవన్ కళ్యాణ్ అద్భుతం..ఓజీపై మెగాస్టార్ చిరంజీవి ప్రశంసల వర్షం

Megastar Chiranjeevi: పవర్ స్టార్ పవన్ కల్యాణ్ నటించిన తాజా చిత్రం ఓజీఘన విజయం సాధించి, నాలుగు రోజుల్లోనే రూ.250 కోట్లను వసూలు చేసి బాక్సాఫీస్‌ను షేక్ చేస్తున్న సంగతి తెలిసిందే. ఈ నేపథ్యంలో మెగాస్టార్ చిరంజీవి ఈ చిత్రంపై తన పూర్తి అభిప్రాయాన్ని, ప్రశంసలను పంచుకున్నారు. కుటుంబ సభ్యులతో కలిసి ఓజీ చిత్రాన్ని ప్రత్యేకంగా వీక్షించిన చిరంజీవి, అనంతరం సోషల్ మీడియా ద్వారా సుదీర్ఘ పోస్ట్ చేశారు. "నా కుటుంబంతో కలిసి ఓజీ చూశాను. సినిమాలోని ప్రతి అంశాన్ని పూర్తిగా ఆస్వాదించాను. ఇది హాలీవుడ్ ప్రమాణాలకు ఏమాత్రం తీసిపోని విధంగా ఉంది" అని చిరంజీవి తన పోస్ట్‌లో పేర్కొన్నారు.

అండర్ వరల్డ్ గ్యాంగ్‌స్టర్ కథ అయినప్పటికీ ఇందులో భావోద్వేగాలకు ఎలాంటి లోటు లేదని చిరు తెలిపారు. దర్శకుడు సుజిత్ పనితీరును కొనియాడుతూ, సినిమా ప్రారంభం నుంచి ముగింపు వరకు ప్రతి సన్నివేశాన్ని ఆయన అద్భుతంగా తీర్చిదిద్దాడని ప్రశంసించారు. తమ్ముడు పవన్ కల్యాణ్ గురించి చిరంజీవి ప్రత్యేకంగా ప్రస్తావించారు. "పవన్‌ను ఇలాంటి పాత్రలో చూడటం చాలా గర్వంగా అనిపించింది. తనదైన ప్రత్యేక ఆకర్షణతో సినిమాను నిలబెట్టాడు. ఎన్నో రోజులుగా ఎదురుచూస్తున్న అభిమానులకు 'ఓజీ'తో సరైన విందు ఇచ్చాడు" అని చిరంజీవి వ్యాఖ్యానించారు. చిత్రానికి సంగీత దర్శకుడు తమన్ అందించిన నేపథ్య సంగీతం సినిమాకు ఆత్మలాంటిదని, విజువల్స్ అద్భుతంగా ఉన్నాయని ఆయన ప్రశంసించారు. ఈ సందర్భంగా చిత్ర బృందానికి చిరంజీవి తన హృదయపూర్వక అభినందనలు తెలియజేశారు.