Piracy Blow to ‘Peddi’: పెద్దికి పైరసీ దెబ్బ..HD ప్రింట్ లీక్..రంగంలోకి మెగా ఫ్యాన్స్

Piracy Blow to ‘Peddi’: గ్లోబల్ స్టార్ రామ్ చరణ్, డైరెక్టర్ బుచ్చిబాబు సన కాంబినేషన్‌లో వచ్చిన రూరల్ స్పోర్ట్స్ యాక్షన్ డ్రామా 'పెద్ది' బాక్సాఫీస్ వద్ద కలెక్షన్ల సునామీ సృష్టిస్తోంది. జూన్ 4న గ్రాండ్‌గా థియేటర్లలోకి వచ్చిన ఈ చిత్రం.. తొలిరోజే ప్రపంచవ్యాప్తంగా ఏకంగా రూ. 135.36 కోట్ల గ్రాస్ వసూలు చేసి హిస్టరీ క్రియేట్ చేసింది. రామ్ చరణ్ సోలో కెరీర్‌లోనే ఇది బిగ్గెస్ట్ ఓపెనింగ్ కావడం విశేషం. జాన్వీ కపూర్ గ్లామర్, కన్నడ సూపర్ స్టార్ శివరాజ్‌కుమార్, జగపతిబాబు, బొమన్ ఇరానీల పవర్‌ఫుల్ పర్ఫార్మెన్స్ ప్రేక్షకులను థియేటర్లలో మెస్మరైజ్ చేస్తోంది. మైత్రీ మూవీ మేకర్స్, సుకుమార్ రైటింగ్స్, వృద్ధి సినిమాస్ నిర్మించిన ఈ విజువల్ వండర్‌కు మెగా ఫ్యాన్స్ థియేటర్ల దగ్గర పండగ చేసుకుంటున్నారు.

కానీ.. ఈ బాక్సాఫీస్ ఛాంపియన్ సంతోషం ఎక్కువసేపు నిలవలేదు. సినిమా విడుదలైన రెండో రోజే టాలీవుడ్‌ను పట్టిపీడిస్తున్న పైరసీ భూతం 'పెద్ది'ని సైతం వెంటాడింది. ప్రముఖ పైరసీ వెబ్‌సైట్లలో ఈ సినిమాకు సంబంధించిన హై-క్వాలిటీ హెచ్‌డీ (HD) ప్రింట్ లీక్ కావడం ఇప్పుడు చిత్ర పరిశ్రమలో తీవ్ర కలకలం రేపుతోంది. ఈ ఆన్‌లైన్ లీకేజీ మేకర్స్‌కు పెద్ద షాక్‌ ఇచ్చింది.వీకెండ్‌ కావడంతో వసూళ్ల పరంగా 'పెద్ది' సరికొత్త రికార్డులు సృష్టిస్తుందని ట్రేడ్ వర్గాలు అంచనా వేస్తున్నాయి. ఇలాంటి తరుణంలో.. థియేటర్లలో చూడాల్సిన ఈ అద్భుతాన్ని మొబైల్ స్క్రీన్స్‌పై డిజిటల్ దొంగలు వదిలేయడంతో, సినిమా లాంగ్ రన్ కలెక్షన్లపై దీని ప్రభావం పడే ప్రమాదం ఉందని సినీ విశ్లేషకులు ఆందోళన వ్యక్తం చేస్తున్నారు.

ఈ దారుణంపై మెగా అభిమానులు సోషల్ మీడియా వేదికగా తీవ్ర ఆగ్రహం వ్యక్తం చేస్తున్నారు. "థియేటర్లలోనే సినిమా చూడండి.. పైరసీని ప్రోత్సహించకండి" అంటూ పెద్ద ఎత్తున సోషల్ మీడియా క్యాంపెయిన్ మొదలుపెట్టారు. పైరసీ లింకులపై సోషల్ మీడియా వేదికగా అభిమానులను, ప్రేక్షకులను అప్రమత్తం చేస్తున్నారు. సైబర్ క్రైమ్ పోలీసులు, చిత్ర డిజిటల్ టీమ్ తక్షణమే స్పందించి ఆ లింకులను ఇంటర్నెట్ నుండి తొలగించాలని కోరుతున్నారు. అంతేకాదు, ఎక్కడైనా పైరసీ లింకులు కనిపిస్తే అధికారిక ప్రొడక్షన్ హౌస్‌కు రిపోర్ట్ చేయాలని ఫ్యాన్స్ పిలుపునిచ్చారు.