Ram Charan’s ‘Peddi’: నెట్‌ఫ్లిక్స్‌లో ట్రెండింగ్ అవుతున్న రామ్ చరణ్ పెద్ది

Ram Charan’s ‘Peddi’: గ్లోబల్ స్టార్ రామ్ చరణ్ నటించిన భారీ బడ్జెట్ స్పోర్ట్స్ డ్రామా ‘పెద్ది’ డిజిటల్ ప్రీమియర్ తర్వాత ప్రముఖ ఓటీటీ ప్లాట్‌ఫామ్ నెట్‌ఫ్లిక్స్ (Netflix) గ్లోబల్ టాప్ 10 లిస్టులోకి ప్రవేశించింది. థియేటర్లలో నెల రోజుల పాటు విజయవంతంగా ప్రదర్శించబడిన ఈ చిత్రం, జూలై 9 నుండి నెట్‌ఫ్లిక్స్‌లో స్ట్రీమింగ్ అవుతోంది. డిజిటల్ స్క్రీన్స్ పైకి వచ్చిన మొదటి వారంలోనే ఈ సినిమా 1.9 మిలియన్ల (19 లక్షలు) వీక్షణలను (Views) సొంతం చేసుకుని, నెట్‌ఫ్లిక్స్ నాన్-ఇంగ్లీష్ చిత్రాల జాబితాలో ఐదో స్థానంలో నిలిచింది. అలాగే ప్రపంచవ్యాప్తంగా తొమ్మిది దేశాలలో టాప్ 10 ట్రెండింగ్‌లో చోటు దక్కించుకుంది.

ప్రపంచ స్థాయి ర్యాంకింగ్స్‌లో చోటు సంపాదించడం సానుకూల అంశమే అయినప్పటికీ, రామ్ చరణ్ వంటి పాన్-ఇండియా స్టార్ నటించిన ఇంత పెద్ద సినిమాకు వచ్చిన వ్యూయర్షిప్ గణాంకాలు మాత్రం ఆశించిన స్థాయిలో లేవనే చెప్పాలి. ‘పెద్ది’ కంటే ఒక రోజు ఆలస్యంగా జూలై 10న నెట్‌ఫ్లిక్స్‌లో విడుదలైన సన్నీ డియోల్ ‘ఇక్కా’ చిత్రం తన మొదటి వారంలోనే ఏకంగా 4.4 మిలియన్ల వీక్షణలతో దూసుకెళ్లి, గ్లోబల్ నాన్-ఇంగ్లీష్ చార్ట్‌లో రెండో స్థానాన్ని కైవసం చేసుకుంది. అదేవిధంగా కపిల్ శర్మ నటించిన ‘దాదీ కీ షాదీ’ చిత్రం తన రెండో వారంలో 2.2 మిలియన్ల వీక్షణలను నమోదు చేసి నాలుగో స్థానంలో నిలవడంతో ‘పెద్ది’ ఐదో స్థానానికి పరిమితం కావాల్సి వచ్చింది.

గ్లోబల్ స్థాయిలో ట్రెండింగ్ అవుతున్నప్పటికీ, ఒక హై-బడ్జెట్ పాన్-ఇండియన్ సినిమా నుండి ఆశించే స్థాయి భారీ ఓటీటీ వ్యూయర్షిప్‌ను రామ్ చరణ్ సినిమా అందుకోలేకపోయింది. ‘ఉప్పెన’ ఫేమ్ బుచ్చిబాబు సానా దర్శకత్వం వహించిన ఈ చిత్రంలో జాన్వీ కపూర్ కథానాయికగా నటించింది. థియేట్రికల్ రిలీజ్ సమయంలో ఈ సినిమాకు ప్రేక్షకులు మరియు విమర్శకుల నుండి మిశ్రమ స్పందన (Mixed Reviews) లభించినప్పటికీ, బాక్సాఫీస్ వద్ద మాత్రం సత్తా చాటి ప్రపంచవ్యాప్తంగా దాదాపు రూ. 340 కోట్ల గ్రాస్ వసూళ్లను సాధించడం విశేషం.