Shruti Haasan: చెన్నై కొత్త ఇంట్లోకి అడుగుపెట్టిన శ్రుతి హాసన్.. సంప్రదాయబద్ధంగా గృహప్రవేశం..

Shruti Haasan: శ్రుతి హాసన్ తన వ్యక్తిగత జీవితంలో సరికొత్త ప్రయాణాన్ని మొదలుపెట్టారు. చెన్నై నగరంలో ఆమె సొంతంగా కొనుగోలు చేసిన నూతన గృహంలోకి నిన్న‌ వైభవంగా ప్రవేశించారు. శాస్త్రోక్తంగా జరిగిన ఈ గృహప్రవేశ పూజా కార్యక్రమానికి సంబంధించిన ఫొటోలను శ్రుతి సోషల్ మీడియా వేదికగా అభిమానులతో పంచుకున్నారు. కొత్త ఇంటి తాళాలు, గృహప్రవేశం కోసం చేసిన ప్రత్యేక పిండివంటల ఫొటోలు ప్రస్తుతం నెట్టింట వైరల్ అవుతున్నాయి.

నిరాడంబరంగా వేడుక.. ఫ్యామిలీ మిస్సింగ్?

ఈ ప్రత్యేక పూజా క్రతువులో శ్రుతి హాసన్ అత్యంత నిరాడంబరంగా, పద్ధతిగా సంప్రదాయ దుస్తుల్లో మెరిశారు. అయితే ఈ జీవితకాలపు ముఖ్య వేడుకకు ఆమె తండ్రి, లోకనాయకుడు కమల్ హాసన్ కానీ, సోదరి అక్షర హాసన్ కానీ హాజరుకాకపోవడం గమనార్హం. కేవలం కొద్దిమంది అత్యంత సన్నిహితులు, స్నేహితుల సమక్షంలోనే ఈ వేడుకను సింపుల్‌గా ముగించారు. హాసన్ కుటుంబ సభ్యులు ఈ వేడుకకు రాకపోవడానికి గల కారణాలు తెలియరాలేదు. దీనిపై సోషల్ మీడియాలో రకరకాల ఊహాగానాలు వ్యక్తమవుతున్నప్పటికీ, శ్రుతి నూతన గృహ ప్రవేశంపై అభిమానులు మాత్రం పెద్ద ఎత్తున శుభాకాంక్షలు తెలుపుతున్నారు.

చెన్నైతో పెరిగిన అనుబంధం..

గత కొన్నేళ్లుగా షూటింగుల నిమిత్తం ముంబై, చెన్నై నగరాల మధ్య నిరంతరం ప్రయాణాలకే పరిమితమైన శ్రుతి హాసన్, ఇప్పుడు చెన్నైలోనే శాశ్వతంగా ఇల్లు కొనుగోలు చేసి స్థిరపడటం విశేషం. గతంలో ముంబైలో ఉన్న ఆమె ఫ్లాట్‌ను తన కళాత్మక అభిరుచులకు తగ్గట్టుగా డిజైన్ చేసుకున్న శ్రుతి, ఇప్పుడు చెన్నైలోని ఈ సరికొత్త హోమ్‌ను మరెంత అందంగా తీర్చిదిద్దుకోబోతున్నారనే ఆసక్తి నెటిజన్లలో నెలకొంది.

కెరీర్ పరంగా ఫుల్ జోష్‌..

ప్రస్తుతం శ్రుతి హాసన్ వరుస ప్రాజెక్టులతో కెరీర్ పరంగా ఎంతో బిజీగా గడుపుతున్నారు. మెగా పవర్ స్టార్ రామ్ చరణ్ నటిస్తున్న పెద్ది చిత్రంలో శ్రుతి ఓ స్పెషల్ సాంగ్‌లో మెరిసి అలరించారు. స్టార్ యాక్టర్ విజయ్ సేతుపతితో కలిసి మిస్కిన్ దర్శకత్వంలో నటిస్తున్న ట్రైన్ మూవీ ప్రస్తుతం శరవేగంగా షూటింగ్ జరుపుకుంటోంది. ఈ చిత్రంతో పాటు మరికొన్ని క్రేజీ మ్యూజిక్ ప్రాజెక్టులతో శ్రుతి హాసన్ టాలీవుడ్, కోలీవుడ్‌లో తన హవాను కొనసాగిస్తున్నారు.