Tabu Receives Royal Welcome: 'కింగ్ 100' సెట్లోకి అడుగుపెట్టిన టబు.. రాయల్ వెల్‌కమ్!

Tabu Receives Royal Welcome: అక్కినేని నాగార్జున, టబులది వెండితెరపై ఒక క్రేజీ కాంబినేషన్. 90వ దశకంలో 'నిన్నే పెళ్లాడతా' వంటి క్లాసిక్ హిట్‌తో ప్రేక్షకులను అలరించిన ఈ జోడీ, సుదీర్ఘ విరామం తర్వాత మళ్ళీ కలిసి నటిస్తుండటంతో అభిమానుల్లో భారీ అంచనాలు నెలకొన్నాయి. నాగార్జున కెరీర్‌లో ఎంతో ప్రతిష్టాత్మకమైన 100వ చిత్రం 'కింగ్ 100' (వర్కింగ్ టైటిల్) సెట్స్‌లోకి తాజాగా టబు అధికారికంగా అడుగుపెట్టారు.

ఈ మైల్‌స్టోన్ ప్రాజెక్టులో టబు ఒక కీలక పాత్ర పోషిస్తున్నారు. తన షూటింగ్ ప్రారంభమైనట్లు ఆమె ఇన్‌స్టాగ్రామ్ వేదికగా క్లాప్ బోర్డ్ ఫోటోను షేర్ చేస్తూ వెల్లడించారు. ఈ పోస్ట్ సోషల్ మీడియాలో వైరల్ కావడంతో, 'నిన్నే పెళ్లాడతా' నాటి కెమిస్ట్రీని మళ్ళీ చూడబోతున్నామంటూ ఫ్యాన్స్ ఉత్సాహం వ్యక్తం చేస్తున్నారు. మరోవైపు, ఆమెకు అన్నపూర్ణ స్టూడియోస్ ఘనంగా స్వాగతం పలికింది. "మా సెట్స్‌లోకి మీకు 'రాయల్ వెల్‌కమ్'. ఈ ల్యాండ్‌మార్క్ మూవీలో మీరు భాగం కావడం మాకు గర్వకారణం. మీ రాకతో ఈ సినిమా మరింత ప్రత్యేకంగా మారనుంది" అంటూ చిత్ర బృందం హృదయపూర్వక సందేశాన్ని పంచుకుంది.

తమిళ దర్శకుడు ఆర్. కార్తీక్ తెరకెక్కిస్తున్న ఈ చిత్రాన్ని అన్నపూర్ణ స్టూడియోస్ అత్యంత భారీ స్థాయిలో నిర్మిస్తోంది. ఈ సినిమాలో సుస్మితా భట్ కూడా ఒక ప్రధాన పాత్రలో నటిస్తున్నారు. ప్రస్తుతం శరవేగంగా షూటింగ్ జరుపుకుంటున్న ఈ చిత్రం, నాగార్జున కెరీర్‌లో మరో గుర్తుండిపోయే సినిమా అవుతుందని చిత్ర యూనిట్ ధీమా వ్యక్తం చేస్తోంది.