Actress Amisha Patel: నేను పెళ్లి చేసుకోకపోవడానికి అసలు కారణమిదే - అమీషా

Actress Amisha Patel: బాలీవుడ్ సీనియర్ నటి అమీషా పటేల్, తాను ఇప్పటికీ పెళ్లి చేసుకోకపోవడానికి గల కారణాలను తాజాగా వెల్లడించారు. తన కెరీర్ కోసం ఎన్నో పెళ్లి ప్రతిపాదనలను తిరస్కరించానని ఆమె తెలిపారు. ఇటీవల ఓ ప్రముఖ యూట్యూబ్ ఛానెల్‌కు ఇచ్చిన ఇంటర్వ్యూలో 50 ఏళ్ల అమీషా పటేల్ ఈ విషయాలను పంచుకున్నారు. ఆమెను పెళ్లి చేసుకోవాలనుకున్న చాలా మంది వ్యక్తులు, పెళ్లి తర్వాత నటన పూర్తిగా మానేసి ఇంటికే పరిమితం కావాలని షరతు పెట్టారని ఆమె వెల్లడించారు. తన కెరీర్‌ను అంత సులువుగా వదులుకోవడానికి ఇష్టపడక, అలాంటి ప్రతిపాదనలను సున్నితంగా తిరస్కరించినట్లు స్పష్టం చేశారు. ప్రేమించే వ్యక్తులు కెరీర్‌లో రాణించడానికి ప్రోత్సాహం ఇవ్వాలని ఆమె అభిప్రాయపడ్డారు.

ప్రేమ కంటే కెరీరే ముఖ్యం

సినిమాల్లోకి రాకముందే తనకు ఒకరితో సీరియస్ రిలేషన్‌షిప్ ఉండేదని అమీషా గుర్తుచేసుకున్నారు. తన పార్ట్‌నర్ పబ్లిక్ లైఫ్‌లో ఉండే వ్యక్తి వద్దని చెప్పడంతో, ప్రేమను వదులుకుని నటిగా కెరీర్‌ను ఎంచుకున్నట్లు వివరించారు

పెళ్లిపై ఆసక్తికర వ్యాఖ్యలు

తాను పెళ్లికి వ్యతిరేకం కాదని, సరైన, అర్హత ఉన్న వ్యక్తి దొరికితే తప్పకుండా చేసుకుంటానని అమీషా అన్నారు. తనకు ఇప్పటికీ మంచి కుటుంబాల నుంచి పెళ్లి సంబంధాలు వస్తున్నాయని, తనలో సగం వయసున్నవారు కూడా డేటింగ్‌కు ఆహ్వానిస్తున్నారని తెలిపారు. వయసుతో సంబంధం లేకుండా మానసిక పరిపక్వత ఉన్న వ్యక్తి అయితే తనకు ఎలాంటి అభ్యంతరం లేదని ఆమె చెప్పారు.

అమీషా పటేల్ కెరీర్

కహో నా ప్యార్ హై, గదర్ వంటి చిత్రాలతో దేశవ్యాప్తంగా గుర్తింపు తెచ్చుకున్న అమీషా, గత ఏడాది విడుదలైన గదర్ 2’ చిత్రంతో భారీ విజయాన్ని అందుకున్నారు. సన్నీ డియోల్తో కలిసి నటించిన ఈ సినిమా ప్రపంచవ్యాప్తంగా రూ.686 కోట్లు వసూలు చేసి సంచలనం సృష్టించింది. ఆ తర్వాత ఆమె తౌబా తేరా జల్వా అనే చిత్రంలో కనిపించారు.