‘Wedding of Virosh’: వెడ్డింగ్ ఆఫ్ విరోష్..పెళ్లిపై విజయ్, రష్మిక ప్రకటన

‘Wedding of Virosh’: టాలీవుడ్ సెన్సేషనల్ స్టార్ విజయ్ దేవరకొండ, నేషనల్ క్రష్ రష్మిక మందన్న తమ పెళ్లి గురించిన వార్తలపై ఎట్టకేలకు అధికారికంగా స్పందించారు. గత కొంతకాలంగా వీరిద్దరూ ప్రేమలో ఉన్నారంటూ సోషల్ మీడియాలో రకరకాల వార్తలు వినిపిస్తున్నప్పటికీ, ఈ జంట ఎప్పుడూ నేరుగా సమాధానం చెప్పలేదు. అయితే, తాజాగా ఆదివారం రాత్రి ఇన్‌స్టాగ్రామ్‌లో ఒక ఉమ్మడి పోస్ట్‌ను పంచుకుంటూ తమ బంధాన్ని ధృవీకరించారు. అభిమానులు తమపై చూపిస్తున్న ప్రేమాభిమానాలకు ఫిదా అయిపోయామని, తాము ఏదైనా నిర్ణయం తీసుకునే లోపే ఫ్యాన్స్ తమ కోసం అన్నీ సిద్ధం చేస్తున్నారని ఈ సందర్భంగా వారు మురిసిపోయారు.

ముఖ్యంగా అభిమానులు వీరిద్దరి పేర్లను కలిపి 'విరోష్' (ViRash) అని పిలుచుకోవడంపై ఈ జంట ఎంతో సంతోషం వ్యక్తం చేసింది. ఫ్యాన్స్ పెట్టిన ఆ పేరు తమకు ఎంతో ప్రత్యేకమని, వారి ఇష్టాన్ని గౌరవిస్తూ తమ వివాహ వేడుకకు కూడా 'వెడ్డింగ్ ఆఫ్ విరోష్' అనే పేరునే ఖరారు చేసినట్లు తెలిపారు. అభిమానులు తమ జీవితంలో ఒక భాగమని, వారి ఆశీస్సులు తమకు ఎల్లప్పుడూ ఉండాలని కోరుకుంటూ విజయ్ మరియు రష్మిక ఈ పోస్ట్‌ను రాసుకొచ్చారు. దీంతో గత కొద్ది రోజులుగా నెట్టింట సాగుతున్న ఊహాగానాలకు తెరపడటమే కాకుండా, అభిమానుల ఆనందానికి అవధులు లేకుండా పోయాయి.

ఈ గ్రాండ్ వెడ్డింగ్ వేడుకకు రాజస్థాన్‌లోని ఉదయ్‌పుర్ నగరం వేదిక కానుంది. ఈ నెల 26వ తేదీన అత్యంత సన్నిహితులు, కుటుంబ సభ్యుల సమక్షంలో వీరిద్దరూ వివాహ బంధంలోకి అడుగుపెట్టబోతున్నారు. 'గీత గోవిందం', 'డియర్ కామ్రేడ్' వంటి చిత్రాలతో వెండితెరపై మ్యాజిక్ చేసిన ఈ హిట్ జోడీ, ఇప్పుడు నిజ జీవితంలోనూ దంపతులుగా మారబోతుండటం విశేషం. ఉదయ్‌పుర్‌లో పెళ్లి ముగిసిన తర్వాత, సినీ ప్రముఖులు మరియు స్నేహితుల కోసం మార్చి 4వ తేదీన హైదరాబాద్‌లో ఘనంగా వివాహ విందును ఏర్పాటు చేయనున్నారు.