Amala Paul: ఆ పాత్ర ఇప్పుడు చేస్తానా? చేయనేమో.. అమలా పాల్ ఆసక్తికర వ్యాఖ్యలు

Amala Paul: నటి అమలా పాల్ తన సినిమాల ఎంపికపై ఆసక్తికర వ్యాఖ్యలు చేసింది. గతంలో ఆమె చాలా కొత్తగా, ధైర్యంగా ఉండే పాత్రల్లో నటించింది. ముఖ్యంగా తమిళ చిత్రం ‘ఆడై’ (తెలుగులో ‘ఆమె’)లో ఆమె చేసిన పాత్ర అప్పట్లో పెద్ద చర్చకు దారితీసింది. అయితే అలాంటి పాత్రను ఇప్పుడు చేయమంటే మాత్రం తాను అంగీకరించకపోవచ్చని అమలా పాల్ చెప్పింది.

మంగళవారం కొచ్చిలో జరిగిన ఇండియా టుడే సౌత్ కాంక్లేవ్ 2026 కార్యక్రమంలో అమలా పాల్ తన సినిమాల ఎంపిక గురించి మాట్లాడింది. తాను ఎప్పుడూ ఒకే తరహా పాత్రలు చేయడానికి ఇష్టపడనని, ప్రతిసారీ కొత్తగా ఏదైనా చేయాలని చూస్తానని చెప్పింది. “సినిమాల కథలు ఎంచుకునే విషయంలో నేను మొదటి నుంచీ కొంచెం భిన్నంగా ఆలోచిస్తాను. గతంలో చేసిన పాత్రను మళ్లీ చేయడం నాకు ఇష్టం ఉండదు. ఎప్పుడూ కొత్త రకాల పాత్రలు చేయాలని ఆసక్తిగా ఉంటుంది” అని అమలా పాల్ చెప్పింది.

తనకు కొత్త కథలు, కొత్త పాత్రలపై ఎప్పుడూ ఆసక్తి ఉంటుందని ఆమె తెలిపింది. అందుకే తనకు ఇలాంటి ప్రత్యేకమైన పాత్రలు వస్తున్నాయని, వాటిని చేయడానికి అవకాశం రావడం అదృష్టంగా భావిస్తున్నానని చెప్పింది. అయితే తన కెరీర్‌లో ఎక్కువగా చర్చకు వచ్చిన ‘ఆడై’ సినిమా గురించి ప్రస్తావిస్తూ.. ఇప్పుడు అదే తరహా పాత్ర చేయమంటే మాత్రం చేయనని అమలా పాల్ స్పష్టం చేసింది.

“ఇప్పుడు నన్ను ‘ఆడై’ లాంటి సినిమా చేయమంటే.. నేను చేస్తానని అనుకోను” అని ఆమె చెప్పింది. తాను గతంలో తీసుకున్న నిర్ణయాలను ఇప్పుడు కూడా అదే విధంగా తీసుకుంటానని చెప్పలేమని అమలా పాల్ వ్యాఖ్యల ద్వారా స్పష్టమవుతోంది.