Devotional: కాశీ క్షేత్రానికి వెళ్లలేనివారు ఇక్కడికి వెళ్లండి.. చాగంటి చెప్పిన ఆలయం!

Devotional: కాశీకీ వెళ్లేముందు తప్పనిసరిగా దర్శించవలసిన క్షేత్రం కుండాలేశ్వరం. అలాగే కాశీ క్షేత్రానికి వెళ్లలేనివారు ఈ కుండాలేశ్వరం క్షేత్రానికి వెళ్ళితే కాశీ క్షేత్రానికి వెళ్లిన పుణ్య ఫలితం కలుగుతుంది అని భక్తుల నమ్మకం. ప్రముఖ ప్రవచనకర్త చాగంటి కోటేశ్వరరావు చెప్పిన ఆలయం కూడా ఇదే. గోదావరి తీరాన వెలసిన కుండాలేశ్వర స్వామి దేవాలయం గురించి శ్రీనాధ మహాకవి తన భీమ ఖండం (భీమేశ్వర పురాణం) లో అద్భుతంగా వర్ణించాడు. గౌతమీ మహాత్మ్యం గ్రంథంలోని 103వ అధ్యాయం ప్రకారం బ్రహ్మదేవుడు నారదునికి ఈ క్షేత్ర మహిమను వివరిస్తూ ఇలా చెప్పారు:

కోటిపల్లి సోమేశ్వరుని దర్శించి బయలుదేరిన గౌతమీ నది భరించలేని వేగంతో సముద్రంలో కలుస్తూ వెళుతుంది. దానికి ఎదురుగా ఉన్న కుండాలేశ్వరం, ఈ సముద్ర ఘోషతో కోపంతో తాకిడి చేయాలని నిర్ణయించుతుంది. కానీ సముద్రుడు గౌతమిని శాంతపర్చడానికి, సూర్యుడి తేజస్సుతో మెరిసే కుండాలను బహుమతిగా ఇచ్చి పూజించాడు. గౌతమి కోపం శాంతించి అక్కడే శివుని ప్రతిష్టకు అంగీకరించింది. అందుకే ఆ స్థలానికి “కుండాలేశ్వరం” అనే పేరు వచ్చింది. ప్రతి పుష్కర సమయము లో ఇక్కడ స్నానం, దానం, పూజలు చేయడం వల్ల అపార పుణ్యం కలుగుతుంది. కోనసీమ జిల్లాలోని అమలాపురం మండలంలో కుండాలేశ్వరపు పాలెం గ్రామంలో ఈ మహా క్షేత్రం వెలసి ఉంది.

ఆలయ దర్శన సమయాలు:

రోజూ ఉదయం 6:00 AM – 12:30 PM

సాయంత్రం 4:00 PM – 8:00 PM

ఎలా చేరుకోవాలి?

బస్సు / రోడ్డు మార్గం:

అమలాపురం బస్టాండ్ నుండి కుండాలేశ్వరపు పాలెం కి షేరింగ్ ఆటోలు లేదా స్థానిక బస్సులు అందుబాటులో ఉన్నాయి.

మురమళ్ళ క్షేత్రం నుండి 6 కిలోమీటర్లు దూరం లో ఉంటుంది.

రాజమండ్రి నుండి అమలాపురం వరకు బస్సు / క్యాబ్ తీసుకొని అక్కడినుంచి వెళ్లవచ్చు.

యానాం నుండి కూడా ఈ క్షేత్రానికి చేరుకోవచ్చు.

చుట్టుపక్కల దర్శనీయ ప్రదేశాలు:

1. అప్పనపల్లి సత్యదేవుని ఆలయం

2. అదురుగాల మల్లికార్జున స్వామి దేవాలయం

3. అంతర్వేది లక్ష్మీ నరసింహ స్వామి ఆలయం (40-50 కిమీ దూరం)

4. అమలాపురం ప్రధాన శివాలయాలు, గోదావరి నది తీర ప్రాంతం

5. మురమళ్ళ క్షేత్రం

కొనసీమ భూమిలో ప్రకృతి అందాలకు నిదర్శనంగా నిలిచే శ్రీ కుండాలేశ్వర స్వామి ఆలయం, అమలాపురం దగ్గర కుండాలేశ్వరపు పాలెం గ్రామంలో వెలసిన పవిత్ర శైవ క్షేత్రం. ప్రతి శివ భక్తుడు జీవితంలో ఒక్కసారైనా ఈ క్షేత్రాన్ని దర్శించాలి.