Worship Lord Shiva: శ్రావణమాసంలో శివుడిని ఎలా పూజించాలి

Worship Lord Shiva: శ్రావణ మాసం శివుడికి అత్యంత ప్రీతికరమైన మాసం. ఈ మాసంలో శివుడిని భక్తి శ్రద్ధలతో పూజిస్తే కోరిన కోరికలు తీరుతాయని నమ్మకం. శ్రావణ మాసంలో సోమవారాలకు ప్రత్యేక ప్రాముఖ్యత ఉంది. ఈ రోజున శివుడితో పాటు పార్వతి దేవిని కూడా పూజించడం వలన కోరిన కోరికలు నెరవేరుతాయి. శ్రావణ మాసంలో శివుడిని పూజించే విధానం ఎంటో ఇప్పుడు తెలుసుకుందాం.

ఉదయాన్నే నిద్రలేచి పవిత్ర నదిలో (గంగా నది అందుబాటులో లేకపోతే ఏదైనా ప్రవహించే నదిలో) లేదా ఇంట్లోనే శుభ్రమైన నీటితో స్నానం చేయాలి. పూజా స్థలాన్ని, శివలింగాన్ని శుభ్రం చేయాలి. పూజ చేసే రోజున తప్పనిసరిగా ఉపవాసం ఉండాలి. శివలింగానికి జలాభిషేకం చేయడం చాలా ముఖ్యం. పాలతో, పెరుగుతో, తేనెతో, నెయ్యితో, చెరుకు రసంతో, పండ్ల రసాలతో కూడా అభిషేకం చేయవచ్చు. ఇది మీకు ఆరోగ్యం, సంపద, ఆర్థిక ప్రయోజనాలను ఇస్తుందని నమ్ముతారు. సోమవారం నాడు ప్రదోష కాలంలో (సాయంత్రం 4:30 నుండి 6:00 గంటల మధ్య) శివుడిని పూజించడం అత్యంత పుణ్యఫలాన్ని ఇస్తుంది.

శివుడికి బిల్వపత్రాలు (మారేడు ఆకులు) సమర్పించడం అత్యంత ప్రీతికరమైనది. మూడు ఆకులతో కూడిన బిల్వపత్రాలు శివుడి మూడు కనులను, త్రిశూలాన్ని సూచిస్తాయి. శివుడికి విభూది (భస్మం) సమర్పించాలి. ఇది శివుడికి చాలా ఇష్టమైనది. తెల్లని మందార పూలు, శంఖం పువ్వులు, సంపెంగ పూలు వంటివి శివుడికి సమర్పించవచ్చు. అయితే, కుంకుమ, తులసి ఆకులు, కొబ్బరి నీళ్ళు, మొగలి పువ్వులు శివుడి పూజలో ఉపయోగించకూడదు. సంతానం కోసం తపించేవారు పాలతో శివలింగానికి అభిషేకం చేయవచ్చు.

శివుడికి శనగలు, వెలగపండు, సగ్గుబియ్యంతో చేసిన పదార్థాలు నైవేద్యంగా సమర్పించవచ్చు. "ఓం నమః శివాయ" అనే పంచాక్షరి మంత్రాన్ని జపించడం వలన శివుని అనుగ్రహం లభిస్తుంది. శివ సహస్రనామ స్తోత్రం పఠించడం కూడా శుభప్రదం. శ్రావణ మాసంలో మాంసాహారం, ఆల్కహాల్, తామసిక ఆహారాలను తీసుకోకూడదు. శక్తి కొలది పేదలకు దానం చేయడం మంచిది.