Palani Murugan Temple: పళని సుబ్రహ్మణ్య స్వామి ఆలయ విశేషాలు మీకు తెలుసా?

Palani Murugan Temple: "పళని" అనే పేరు వెనుక ఒక ఆసక్తికరమైన పురాణ గాథ ఉంది. ఒకసారి నారదుడు శివపార్వతులకు జ్ఞాన ఫలాన్ని (మామిడి పండు) తీసుకొస్తాడు. ఆ పండును ఎవరికి ఇవ్వాలో నిర్ణయించడానికి శివపార్వతులు తమ కుమారులైన గణేశుడు, సుబ్రహ్మణ్యులను ముల్లోకాలను ప్రదక్షిణ చేసి రావాలని చెబుతారు. సుబ్రహ్మణ్యుడు తన నెమలి వాహనంపై విశ్వాన్ని చుట్టి రావడానికి బయల్దేరగా, గణేశుడు తన తల్లిదండ్రులైన శివపార్వతులను ప్రదక్షిణ చేసి, వారే జ్ఞాన ఫలాలని నిరూపించుకుంటాడు. దీంతో కోపగించిన సుబ్రహ్మణ్యుడు పళని కొండపైకి వచ్చి మౌనంగా ఉండిపోతాడు. అప్పుడు శివుడు వచ్చి "నీవే సకల జ్ఞాన ఫలము" అని చెబుతాడు. తమిళంలో "పళం" (పండు/ఫలం), "నీ" (నీవు) కలిపి "పళని" అనే పేరు వచ్చిందని చెబుతారు. ఈ క్షేత్రం జ్ఞానాన్ని ప్రసాదించే క్షేత్రంగా ప్రసిద్ధి చెందింది.

ఈ ఆలయంలో సుబ్రహ్మణ్య స్వామిని దండాయుధపాణి అనే నామంతో పూజిస్తారు. అంటే చేతిలో దండం పట్టుకున్నవాడని అర్థం. స్వామివారు ఇక్కడ ఒక చేతిలో దండం పట్టుకుని, కౌపీనధారియై, జటామకుటంతో, చిరునవ్వులు చిందిస్తూ నిలుచుని ఉంటారు. ఈ రూపం భగవాన్ రమణ మహర్షి రూపాన్ని పోలి ఉంటుందని కొందరు పెద్దలు చెబుతారు.

1. విగ్రహ నిర్మాణం - నవపాషాణాలు:

o పళని ఆలయంలోని గర్భగుడిలో ఉన్న స్వామి వారి విగ్రహం నవపాషాణాలతో (తొమ్మిది రకాల విషపూరిత మూలికలు మరియు ఖనిజాలతో) రూపొందించబడింది. ఇటువంటి స్వరూపం ప్రపంచంలో మరెక్కడా లేదని చెబుతారు.

o ఈ విగ్రహాన్ని సిద్ధ భోగర్ అనే మహర్షి తయారు చేశారు. నవపాషాణాలు ఔషధ గుణాలు కలిగి ఉన్నందున, ఈ విగ్రహానికి అభిషేకించిన తీర్థం, విభూతి వంటివి భక్తులకు ఆరోగ్య సమస్యలను నయం చేస్తాయని ప్రతీతి. పూర్వం విగ్రహం తొడ భాగం నుండి విభూతిని తీసి భక్తులకు పంపిణీ చేసేవారు, అయితే కాలక్రమేణా విగ్రహం అరిగిపోవడం వల్ల దానిని నిలిపివేశారు.

2. ఆలయ చరిత్ర, నిర్మాణం:

ప్రస్తుతం ఉన్న ఆలయాన్ని సా.శ. 7వ శతాబ్దంలో కేరళ రాజు అయిన చీమన్ పెరుమాళ్ నిర్మించాడని చరిత్ర చెబుతోంది. ఆ తర్వాత పాండ్యులు ఈ మందిరాన్ని అభివృద్ధి చేశారు. ఆలయం ఒక కొండపై నిర్మించబడింది. ఆలయ సందర్శనకు 659 మెట్లను ఎక్కవలసి ఉంటుంది. మెట్లు ఎక్కలేని వారి కోసం ఏరియల్ రోప్-వే మరియు ఎలక్ట్రిక్ విన్చ్ (ట్రాలీ) సౌకర్యాలు అందుబాటులో ఉన్నాయి. కొండ చుట్టూరా చక్కని రోడ్డు ఉంది, ఇది గిరి ప్రదక్షిణకు అనుకూలంగా ఉంటుంది.

3. ప్రాముఖ్యత , ఉత్సవాలు:

పళని క్షేత్రం ప్రఖ్యాత కావడి ఉత్సవాలకు పుట్టినిల్లు. భక్తులు భక్తిశ్రద్ధలతో కావడిలను భుజాలపై పెట్టుకొని స్వామి దర్శనానికి వస్తారు. మూలస్థానంలో కొలువుదీరిన కుమారస్వామి భక్తజన సంరక్షకుడిగా, కోరిన వరాలు ప్రసాదించే దేవుడిగా ప్రసిద్ధి చెందాడు. ప్రతి నెల కృత్తికా నక్షత్రం నాడు స్వామివారికి ప్రత్యేక పూజలు నిర్వహిస్తారు. ఆషాఢ కృత్తిక సందర్భంగా విశేష వైభవ ఉత్సవాలు జరుగుతాయి. పళని సుబ్రహ్మణ్య స్వామి ఆలయం కేవలం ఒక దేవాలయం మాత్రమే కాదు, అది ఆధ్యాత్మికత, చరిత్ర, అద్భుతమైన నిర్మాణ కళకు ప్రతీక.