Performing Lakshmi Puja on Friday: శుక్రవారం లక్ష్మీ పూజ చేస్తున్నారా? పొరపాటున కూడా ఈ తప్పులు చేయకండి..

Performing Lakshmi Puja on Friday: హిందూ సంప్రదాయంలో శుక్రవారానికి ఎంతో విశిష్టమైన ప్రాముఖ్యత ఉంది. ఈ రోజును సంపద, ఐశ్వర్యాలకు అధిదేవత అయిన మహాలక్ష్మి దేవికి అత్యంత ప్రీతిపాత్రమైన రోజుగా భావిస్తారు. శుక్రవారం నాడు ఎవరైతే భక్తిశ్రద్ధలతో అమ్మవారిని ఆరాధిస్తారో.. వారి ఇంట ఆనందం, అష్టైశ్వర్యాలు, ప్రశాంతత వెల్లివిరుస్తాయని నమ్ముతారు. పురాణాల ప్రకారం, శుక్రవారాల్లో చేసే కొన్ని ప్రత్యేక పూజా విధానాలు మానవాళికి ఎనిమిది రకాల శుభ గుణాలను ప్రసాదిస్తాయి.

శుక్రవారం లక్ష్మీ పూజ ఎందుకు అంత ప్రత్యేకం?

జ్యోతిష్య శాస్త్రం ప్రకారం శుక్రవారం శుక్ర గ్రహానికి సంబంధించిన రోజు. శుక్రుడిని సంపద, విలాసం, సౌందర్యం, శ్రేయస్సుకు కారకుడిగా పరిగణిస్తారు. అందుకే ఈ రోజున మహాలక్ష్మి దేవిని పూజించడం వల్ల జాతకంలో శుక్ర దోషాలు తొలగిపోవడమే కాకుండా కుటుంబ శ్రేయస్సు, వ్యాపార-వృత్తిపరమైన రంగాలలో అద్భుతమైన అభివృద్ధి కలుగుతుందని భక్తుల బలమైన నమ్మకం.

పూజకు ముందు చేయవలసిన ఏర్పాట్లు..

ఉదయమే నిద్రలేచి తలస్నానం చేసి, శుభ్రమైన సాంప్రదాయ వస్త్రాలను ధరించాలి.

ఇల్లు మొత్తాన్ని, ముఖ్యంగా పూజా గదిని ఎంతో పరిశుభ్రంగా ఉంచుకోవాలి.

ఇంటి ప్రధాన ద్వారం వద్ద అందమైన పూల కుండీలను ఉంచి, ముగ్గులు వేసి, ఒక దీపాన్ని వెలిగించాలి. దీనివల్ల లక్ష్మీదేవి ఆకర్షితురాలవుతుంది.

లక్ష్మీదేవి విగ్రహాన్ని లేదా పటాన్ని పసుపు, కుంకుమ, గంధంతో చక్కగా అలంకరించుకోవాలి.

లక్ష్మీదేవికి ఇష్టమైన పూజా విధానం..

పూజ గదిలో ఆవు నెయ్యి లేదా నువ్వుల నూనెతో దీపారాధన చేయాలి.

అమ్మవారికి ఎంతో ప్రీతిపాత్రమైన ఎర్రటి పూలు లేదా తామర పువ్వులతో అలంకరించి పూజించాలి.

కుంకుమ లేదా పసుపుతో లక్ష్మీ అష్టోత్తర శతనామావళి పఠిస్తూ అర్చన చేయాలి.

నైవేద్యంగా పాలు, పాయసం, లేదా పంచదార పొంగలి సమర్పించాలి. పూజ ముగిసిన తర్వాత హారతి ఇచ్చి, కుటుంబ సభ్యులకు ప్రసాదం పంచాలి.

ఆధ్యాత్మిక గ్రంథాల ప్రకారం:

శుక్రవారం సాయంత్రం వేళ ఇంటి ఈశాన్య మూలలో రెండు దీపాలు వెలిగించి, “ఓం శ్రీ మహాలక్ష్మి నమః” అనే మంత్రాన్ని 108 సార్లు జపిస్తే అమ్మవారి కటాక్షం లభిస్తుంది.

శుక్రవారం నాడు పొరపాటున కూడా ఈ పనులు చేయకండి..

లక్ష్మీదేవి అనుగ్రహం కలగాలన్నా, ఉన్న లక్ష్మి ఇల్లు దాటి పోకూడదన్నా శుక్రవారం నాడు కొన్ని వస్తువులను కొనడం, కొన్ని పనులు చేయడం నిషిద్ధం. జ్యోతిష్య శాస్త్రం ప్రకారం ఆ నియమాలు ఇవే..

వంటగది సామాన్లు కొనకూడదు:

శుక్రవారం నాడు కొత్తగా వంటగది సామాన్లను లేదా ఇనుప వస్తువులను అస్సలు కొనకూడదు. దీనివల్ల జీవితంలో ఆర్థిక ఇబ్బందులు, సమస్యలు తలెత్తుతాయి.

ఆస్తి లావాదేవీలు వద్దు:

శుక్రవారాల్లో ఎలాంటి ఆస్తి కొనుగోళ్లు లేదా భూమి లావాదేవీలు చేయకపోవడం మంచిది. వీటికి దూరంగా ఉండకపోతే కుటుంబంపై ప్రతికూల ప్రభావం పడుతుంది.

స్వీట్లు పంచకూడదు:

ఈ రోజున పొరపాటున కూడా బయటి వ్యక్తులకు స్వీట్లు ఉచితంగా ఇవ్వకూడదు. దీనివల్ల మీ జాతకంలో శుక్రుడు బలహీనపడి, ఇంట్లోని ప్రశాంతత దెబ్బతింటుంది.

డబ్బు చేతులు మారకూడదు:

శుక్రవారం నాడు ఎవరికీ అప్పు ఇవ్వడం కానీ, ఎవరి దగ్గరైనా అప్పు తీసుకోవడం కానీ చేయకూడదు. ధన రూపంలో ఉండే లక్ష్మిని ఈ రోజున ఇతరులకు ఇస్తే అమ్మవారికి కోపం వస్తుంది.

ఇల్లు అపరిశుభ్రంగా ఉండకూడదు:

లక్ష్మీదేవి ఎప్పుడూ పరిశుభ్రంగా ఉండే ప్రదేశంలోనే కొలువై ఉంటుంది. కాబట్టి శుక్రవారం నాడు ఇల్లు, పూజ గది మురికిగా ఉంటే అక్కడ అలక్ష్మి ( తాండవిస్తుంది.