Placing Photos at Home: ఇంట్లో ఫోటోలు పెడుతున్నారా? ఈ వాస్తు తప్పులు చేస్తే అరిష్టమే.. ఏ దిశలో ఏ ఫోటో ఉండాలో తెలుసుకోండి..

Placing Photos at Home: చాలామంది ఇల్లు అందంగా కనిపించాలని రకరకాల పెయింటింగ్స్, దేవుళ్ల పటాలు లేదా ఫ్యామిలీ ఫోటోలను గోడలకు తగిలిస్తుంటారు. అయితే, వాస్తు శాస్త్రం ప్రకారం ప్రతి చిత్రానికి ఒక ప్రత్యేక శక్తి ఉంటుంది. తప్పుడు దిశలో ఉంచే ఒక చిన్న ఫోటో కూడా ఇంట్లో అశాంతికి, ఆర్థిక నష్టాలకు దారితీస్తుందని నిపుణులు హెచ్చరిస్తున్నారు. మీ ఇంట్లో సానుకూలత పెరగాలంటే ఈ క్రింది నియమాలను తప్పక పాటించండి.

పూర్వీకుల చిత్రాలు: దేవుడి గదిలో వద్దు

మనం గౌరవంతో మన పితృదేవతల ఫోటోలను దేవుడి గదిలో ఉంచుతుంటాం. కానీ వాస్తు ప్రకారం ఇది తప్పు. పూర్వీకుల చిత్రాలను ఎప్పుడూ దక్షిణం వైపు గోడపైనే ఉంచాలి. వీటిని పూజా గదిలో దేవుళ్ల పటాలతో కలిపి ఉంచకూడదు. ఇలా చేయడం వల్ల ఇంట్లో దోషాలు ఏర్పడే అవకాశం ఉంది.

దేవుళ్ల పటాలు ఎక్కడ ఉండాలి?

ఇంట్లో ఆధ్యాత్మికత, ప్రశాంతత కోసం దేవుళ్ల చిత్రాలను ఈశాన్యం మూలలో ఉంచడం అత్యంత శుభప్రదం. ఈ దిశలో దైవశక్తి ఎక్కువగా ఉంటుందని నమ్ముతారు.

జలపాతాలు.. ప్రవహించే నీరు:

చాలామంది హాల్‌లో జలపాతాలు లేదా సముద్రపు దృశ్యాలు ఉన్న పెయింటింగ్స్ ఇష్టపడతారు. ఇలాంటి చిత్రాలను ఎప్పుడూ ఉత్తరం లేదా తూర్పు దిశలోనే ఉంచాలి. పొరపాటున దక్షిణం దిశలో జలపాతం ఫోటో పెడితే, అనవసరపు ఖర్చులు పెరగడమే కాకుండా ఉద్యోగ, వ్యాపార అవకాశాలు దెబ్బతింటాయి. నీరు బయటకు వెళ్తున్నట్టు కాకుండా, ఇంటి లోపలికి ప్రవహిస్తున్నట్టుగా ఉన్న చిత్రాలనే ఎంచుకోవాలి.

కుటుంబ సభ్యుల ఫోటోలు:

కుటుంబంలో ఐక్యత, ప్రేమ పెరగాలంటే గ్రూప్ ఫోటోలను నైరుతి దిశలో ఉంచాలి. ఇది సంబంధాలను బలపరుస్తుంది. పొరపాటున కూడా ఉత్తరం లేదా తూర్పు మూలలో ఫ్యామిలీ ఫోటోలు పెట్టకండి; దీనివల్ల సభ్యుల మధ్య విభేదాలు వచ్చే ప్రమాదం ఉంది.

వీటిని అస్సలు ఉంచకండి..

కొన్ని రకాల చిత్రాలు ఇంట్లో ప్రతికూల శక్తిని పెంచుతాయి..

క్రూర మృగాలు (సింహాలు, పులులు) ఫోటోలు.

యుద్ధ దృశ్యాలు లేదా హింసను సూచించే చిత్రాలు.

విరిగిపోయిన వస్తువులు లేదా నిరాశను కలిగించే పెయింటింగ్స్.

ఇలాంటివి మానసిక అశాంతిని కలిగించడమే కాకుండా జీవితంలో పతనానికి కారణమవుతాయి.