Balarama Jayanti: నేడు బలరామ జయంతి.. ఎలా పూజించాలంటే?

Balarama Jayanti:  బలరాముడు శ్రీకృష్ణుడి అన్నయ్య, శేషనాగు అంశ. బలరామ జయంతిని భారతదేశంలోని కొన్ని ప్రాంతాల్లో, ముఖ్యంగా ఉత్తర భారతదేశంలో శ్రావణ మాసంలో బహుళ పక్షం త్రయోదశి నాడు జరుపుకుంటారు.

బలరాముడు శ్రీకృష్ణుడి అన్నయ్య. ఆయన జన్మదినాన్ని పురస్కరించుకుని ఈ పండుగను జరుపుకుంటారు. బలరాముడిని విష్ణువు యొక్క ఎనిమిదవ అవతారంగానూ, ఆదిశేషుడి అవతారంగానూ భావిస్తారు. బలరాముడు తన అపారమైన శారీరక బలానికి ప్రసిద్ధి చెందారు. అందుకే ఆయనను 'బల'రాముడు అని పిలుస్తారు. ఆయన ఆయుధం నాగలి (హల). అందుకే ఆయనను 'హలాయుధ' అని కూడా పిలుస్తారు. బలరాముడు వ్యవసాయానికి, రైతుల రక్షణకు చిహ్నం. ఈ రోజున రైతులు తమ పొలాలను దున్నుతారు లేదా పూజిస్తారు.

పూజ సామగ్రి

బలరాముడి ఫోటో లేదా విగ్రహం, పువ్వులు, కొబ్బరికాయ, పండ్లు, బెల్లం, నువ్వులు, పాలు, పెరుగు, నెయ్యి,సువాసన కోసం అగరుబత్తీలు, ధూపం దీపం, నూనె, పవిత్ర జలం (గంగాజలం అయితే మరీ మంచిది)

పూజా విధానం

ఉదయాన్నే లేచి తలస్నానం చేసి శుభ్రమైన దుస్తులు ధరించాలి. పూజ చేసే స్థలాన్ని కూడా శుభ్రం చేసుకోవాలి. ఒక పీట మీద ఎర్రటి వస్త్రం పరచి, దానిపై బలరాముడి ఫోటో లేదా విగ్రహాన్ని ఉంచాలి. పసుపు, కుంకుమలతో అలంకరించాలి. పూజకు ముందు, "ఈ రోజు బలరామ జయంతిని పురస్కరించుకుని ఈ పూజ చేస్తున్నాను" అని మనసులో అనుకోవాలి. దీపం వెలిగించి, అగరుబత్తీలు వెలిగించాలి. తరువాత బలరాముడిని మనసారా ప్రార్థించి, పుష్పాలు సమర్పించాలి. బలరాముడికి పాలు, పెరుగు, బెల్లం, కొబ్బరికాయతో చేసిన పరమాన్నం, పండ్లు నైవేద్యంగా సమర్పించాలి. బలరాముడికి దున్నపోతు లాగే వ్యవసాయానికి ఉపయోగపడే ఆయుధాలు, నాగలి, రోకలి వంటి వాటిని పూజిస్తారు. ఓం నమో భగవతే బలభద్రాయ నమః అనే మంత్రాన్ని వీలైనన్ని ఎక్కువ సార్లు జపించాలి. సాయంత్రం సమయంలో ఇంటి ఆవరణలో గోవులను, వాటి దూడలను పూజిస్తారు. గోవులకి బలరాముడు చాలా ప్రీతిపాత్రుడు. పూజ తర్వాత తీర్థ ప్రసాదాలు అందరికీ పంచాలి. ఇలా చేస్తే బలరాముడి ఆశీస్సులు లభిస్తాయి.