Troubled by Saturn and Rahu Doshas: జాతకంలో శని, రాహు దోషాలు పోవాలన్నా.. భయాలు తొలగాలన్నా ఈ పరిహారం చేయండి..

Troubled by Saturn and Rahu Doshas: హిందూమతంలో కాలభైరవుడిని కాలానికి అధిపతిగా, దుష్ట శక్తులను నాశనం చేసి భక్తులను రక్షించే దైవంగా పరమ పవిత్రంగా పూజిస్తారు. పరమశివుని రౌద్ర రూపమైన కాలభైరవుని అనుగ్రహం కోసం ప్రతి నెల వచ్చే అష్టమి తిథి అత్యంత శుభప్రదమైన రోజుగా భావిస్తారు. జీవితంలో ఎదురయ్యే ఆటంకాలు, ఆకస్మిక ప్రమాదాలు, కోర్టు సమస్యలు, శత్రు భయాలు, మానసిక రుగ్మతల నుండి విముక్తి పొందడానికి చాలా మంది ఈ రోజున ప్రత్యేక పూజలు చేస్తుంటారు. భక్తి, విశ్వాసంతో కాలభైరవుడిని పూజించడం వల్ల మానసిక బలం, ఆధ్యాత్మిక విశ్వాసం ఎలా పెరుగుతాయో.. ఆ రోజు చేయాల్సిన పరిహారాలు ఏంటో ఇప్పుడు చూద్దాం.

అష్టమి రోజున పూజా విధానం:

అష్టమి తిథి రోజున ఉదయాన్నే నిద్రలేచి, తలస్నానం చేసి, శుభ్రమైన బట్టలు ధరించి పూజకు సిద్ధం కావాలి.

ఇంట్లోని పూజా మందిరంలో కాలభైరవుడి లేదా శివుని చిత్రం ముందు దీపం వెలిగించి, ఎర్రటి పువ్వులు సమర్పించి ప్రార్థించాలి.

కాలభైరవునికి నల్ల నువ్వుల నూనెతో దీపారాధన చేయడం అత్యంత శుభప్రదంగా జ్యోతిష్య శాస్త్రం చెబుతోంది.

పూజ సమయంలో భైరవ గాయత్రీ మంత్రాన్ని లేదా భైరవాష్టకాన్ని జపించడం వల్ల ఇల్లంతా సానుకూల ఆలోచనలు పెంపొంది, మానసిక ప్రశాంతత లభిస్తుంది.

కుక్కలకు ఆహారం పెట్టడం వెనుక ఉన్న రహస్యం:

హిందూ పురాణాల ప్రకారం శునకం కాలభైరవుని వాహనంగా పరిగణించబడుతుంది. అందువల్ల, అష్టమి నాడు కుక్కలకు, ముఖ్యంగా నల్ల కుక్కలకు ఆహారం పెట్టడం ఒక గొప్ప పుణ్యకార్యం.

ఆకలితో ఉన్న కుక్కలకు పాలు, రొట్టెలు లేదా ఆహారం ఇవ్వడం వల్ల జాతకంలోని రాహు, కేతు, శని గ్రహ దోషాల తీవ్రత తగ్గుతుందని భక్తుల నమ్మకం. ఈ సత్క్రియ మనలో కరుణా భావాన్ని పెంచడమే కాకుండా కెరీర్‌లో ఎదురయ్యే అడ్డంకులను తొలగించడంలో సహాయపడుతుంది.

ప్రతికూల శక్తుల నుండి రక్షణ..

కాలభైరవుడిని ఆరాధించడం వల్ల మనసులోని ప్రతికూల ఆలోచనలు, డిప్రెషన్ మరియు అనవసర భయాలు, ఒత్తిడి త్వరగా తగ్గుతాయి. క్రమం తప్పకుండా కాలభైరవ నామ స్మరణ చేసేవారికి ఎనలేని మానసిక ధైర్యం, ఆత్మవిశ్వాసం సిద్ధిస్తాయి. వృత్తి, ఉద్యోగం, చదువు, కుటుంబ జీవితంలో శత్రువుల వల్ల వచ్చే ఇబ్బందులను ఎదుర్కొనేందుకు ఈ పూజ మనకు అపారమైన అంతర్గత శక్తిని ఇస్తుంది.