TTD: స్థానిక సంస్థల ఎన్నికల నేపథ్యంలో ఎన్నికల ప్రవర్తనా నియమావళి (మోడల్ కోడ్ ఆఫ్ కండక్ట్) అమల్లోకి రావడంతో తిరుమల తిరుపతి దేవస్థానం (టీటీడీ) కీలక నిర్ణయం తీసుకుంది. ఎన్నికల కోడ్ అమల్లో ఉన్నంత కాలం శ్రీవారి దర్శనం, వసతి కోసం ఎలాంటి సిఫార్సు లేఖలను స్వీకరించబోమని స్పష్టం చేసింది.
సాధారణంగా ప్రముఖులు, ప్రజాప్రతినిధులు, ఇతర ముఖ్య వ్యక్తుల సిఫార్సు లేఖల ద్వారా శ్రీవారి దర్శనం, తిరుమలలో వసతి పొందే అవకాశం ఉంటుంది. అయితే ప్రస్తుతం ఎన్నికల ప్రవర్తనా నియమావళి అమల్లో ఉన్నందున ఈ విధానానికి తాత్కాలికంగా బ్రేక్ పడింది. ఎన్నికల కోడ్ ముగిసే వరకు సిఫార్సు లేఖలను పరిగణనలోకి తీసుకోబోమని టీటీడీ తెలిపింది.
అయితే స్వయంగా తిరుమలకు వచ్చే ప్రోటోకాల్ ప్రముఖులకు మాత్రం నిబంధనల ప్రకారం శ్రీవారి దర్శనం, వసతి సౌకర్యాలు కల్పిస్తామని టీటీడీ పేర్కొంది. ప్రోటోకాల్ పరిధిలోకి వచ్చే ప్రముఖులు స్వయంగా వచ్చినప్పుడు వారికి వర్తించే నిబంధనల ప్రకారం ఏర్పాట్లు చేస్తామని వెల్లడించింది.
ఎన్నికల ప్రవర్తనా నియమావళి అమల్లో ఉన్న సమయంలో ఎలాంటి సిఫార్సు లేఖలతో తిరుమలకు వచ్చి దర్శనం, వసతి కోసం ప్రయత్నించవద్దని టీటీడీ భక్తులకు సూచించింది. ఈ నిర్ణయాన్ని భక్తులు గమనించి, టీటీడీకి సహకరించాలని విజ్ఞప్తి చేసింది.
ఎన్నికల ప్రక్రియ పూర్తయి, మోడల్ కోడ్ ఆఫ్ కండక్ట్ తొలగించే వరకు ఈ నిబంధనలు అమల్లో ఉంటాయని టీటీడీ స్పష్టం చేసింది. భక్తులు ముందుగానే ఈ విషయాన్ని తెలుసుకుని తమ తిరుమల పర్యటనను అందుకు అనుగుణంగా ప్లాన్ చేసుకోవాలని కోరింది.