Vinayaka Chavithi: వినాయక చవితి నాడు ఏంచేయాలి.. ఏం చేయొద్దు..?

Vinayaka Chavithi: భాద్రపద మాసంలో వచ్చే పర్వదినాలలో అత్యంత పవిత్రమైనది వినాయక చవితి. సమస్త విఘ్నాలను తొలగించే లంబోదరుడిని పూజించడం ద్వారా ఆయురారోగ్యాలు, విద్యాబుద్ధులు, అష్టైశ్వర్యాలు సిద్ధిస్తాయని భక్తుల విశ్వాసం. అయితే వినాయక చవితిని శాస్త్రోక్తంగా ఎలా జరుపుకోవాలి? గణపతి అనుగ్రహం కోసం ఎలాంటి పూజా విధానాన్ని అనుసరించాలి? అనే అంశాలపై ప్రముఖ జ్యోతిష్యులు కీలక విషయాలు వెల్లడించారు.

పండుగ వెనుక ఆధ్యాత్మిక అంతరార్థం

వినాయకుడు కేవలం రూపానికి మాత్రమే పరిమితం కాదని, ఆయన పరబ్రహ్మ స్వరూపమని కే.ఎన్. సోమయాజి వివరించారు. ఏ పని మొదలుపెట్టినా మొదటి పూజ వినాయకుడికే చెల్లించడం మన సనాతన సంప్రదాయం. ప్రకృతితో మమేకమై ఉండే పండుగ ఇది. మట్టితో చేసిన ప్రతిమను ప్రతిష్ఠించి పూజించడం వెనుక పంచభూతాల ఆరాధన దాగి ఉంది.

పూజలో పాటించాల్సిన ముఖ్యమైన నియమాలు

మట్టి వినాయకుడే శ్రేష్ఠం:

రసాయనాలు, ప్లాస్టర్ ఆఫ్ ప్యారిస్ విగ్రహాల కంటే స్వచ్ఛమైన బంకమట్టితో చేసిన విగ్రహాన్ని పూజించడమే శాస్త్ర సమ్మతం, పర్యావరణానికి రక్ష.

పత్ర పూజ విశిష్టత:

వినాయకుడికి చేసే ఏకవింశతి పత్ర పూజకు అపారమైన ప్రాముఖ్యత ఉంది. ఈ పత్రాలు కేవలం పూజా ద్రవ్యాలు మాత్రమే కాక, ఆయుర్వేద పరంగా విశేష ఔషధ గుణాలు కలవి.

గరిక :

గణపతికి అత్యంత ప్రీతికరమైనది గరిక. గరికతో చేసే పూజ వల్ల గ్రహదోషాలు, మానసిక అలజడులు తొలగి మనశ్శాంతి లభిస్తుంది.

నైవేద్య సమర్పణ:

ఉండ్రాళ్ళు, కుడుములు, మోదకాలు, బెల్లం, శనగలు, పండ్లు సమర్పించి భక్తిశ్రద్ధలతో నైవేద్యం పెట్టాలి.

ఇంట్లో ప్రతిష్ఠాపన – వాస్తు సూచనలు

గణపతిని ప్రతిష్ఠించే సమయంలో ఈశాన్య మూల లేదా ఉత్తరం, తూర్పు దిశలు అనుకూలమైనవి. పూజ చేసే సమయంలో భక్తులు ఉత్తరం లేదా తూర్పు ముఖంగా కూర్చొని పూజించడం వల్ల సకల శుభాలు కలుగుతాయని పండితులు తెలిపారు.

వినాయక చవితి చంద్ర దర్శన నియమం

చవితి నాడు చంద్రుడిని చూడకూడదనే నియమం వెనుక పురాణ గాథ ఉంది. చంద్రుని దర్శనం వల్ల కలిగే నీలాపనిందల (మిథ్యాభిశాపం) నివారణకు స్యమంతకోపాఖ్యానం చదువుకుని, అక్షతలు తలపై వేసుకోవడం అత్యంతావశ్యకమని గుర్తుచేశారు.