Dronacharya’s Ashram: ద్రోణాచార్యుడి ఆశ్రమం ఇక్కడే ఉందా? 55 ఏళ్ల తర్వాత మళ్లీ తవ్వకాలు.. బయటపడుతున్న పురాతన నిర్మాణాలు!

Dronacharya’s Ashram: మహాభారతంలో పాండవులు, కౌరవులకు విలువిద్య, యుద్ధవిద్య నేర్పించిన గురువు ద్రోణాచార్యుడు. ఆయన ఆశ్రమం ఎక్కడ ఉండేది? పాండవులు విద్య నేర్చుకున్న ప్రదేశం నిజంగా ఇప్పటికీ ఉందా? ఇలాంటి ప్రశ్నలకు సమాధానాలు వెతికే దిశగా పురావస్తు శాఖ అధికారులు కీలక పరిశోధనలు ప్రారంభించారు.

ఉత్తరాఖండ్‌లోని కాషీపూర్ ప్రాంతంలో ఉన్న గోవిషాణ్ అనే పురాతన ప్రాంతంలో భారత పురావస్తు శాఖ (ASI) మళ్లీ తవ్వకాలు ప్రారంభించింది. దాదాపు 55 ఏళ్ల విరామం తర్వాత జరుగుతున్న ఈ తవ్వకాలు ఇప్పుడు చర్చనీయాంశంగా మారాయి.

పాండవులకు ఈ ప్రాంతంతో సంబంధం ఏమిటి?

స్థానిక కథనాల ప్రకారం, మహాభారత కాలంలో ఈ ప్రాంతం ద్రోణాచార్యుడి నివాసంగా, శిక్షణా కేంద్రంగా ఉండేదని చెబుతారు. ద్రోణాచార్యుడి దగ్గర విద్య నేర్చుకున్న పాండవులు, గురుదక్షిణగా ద్రోణసాగర్ సరస్సును నిర్మించారని స్థానిక విశ్వాసం. అయితే ఈ కథనాలకు ఇప్పటివరకు పూర్తిస్థాయి పురావస్తు నిర్ధారణ లభించలేదు.

తవ్వకాల్లో ఏం బయటపడింది?

సుమారు 90 ఎకరాల విస్తీర్ణంలో ఉన్న ఈ పురాతన ప్రాంతంలో గతంలోనూ పలుమార్లు తవ్వకాలు జరిగాయి. 1939-40, 1965-66, 1970-71 సంవత్సరాల్లో జరిగిన పరిశోధనల్లో గుప్తుల కాలం నుంచి మధ్యయుగాల వరకు నిర్మించిన ఆలయ ఆనవాళ్లు, ఇటుక నిర్మాణాలు, ఇతర పురాతన వస్తువులు బయటపడ్డాయి.

తాజాగా ప్రారంభించిన తవ్వకాల్లో కూడా పురాతన ఇటుక నిర్మాణాలు, వృత్తాకార నిర్మాణం బయటపడ్డాయి. ఇవి ఏ కాలానికి చెందినవి? వాటి అసలు ఉపయోగం ఏమిటి? అనే విషయాలను అధికారులు పరిశీలిస్తున్నారు.

చైనా యాత్రికుడి రాతల్లోనూ ఈ ప్రాంతం!

ఈ ప్రాంతానికి మరో ప్రత్యేకత కూడా ఉంది. ఏడో శతాబ్దంలో భారతదేశాన్ని సందర్శించిన చైనా బౌద్ధ యాత్రికుడు హ్యూయెన్‌త్సాంగ్ తన ప్రయాణ వివరాల్లో గోవిషాణ్ అనే ప్రాంతాన్ని ప్రస్తావించాడు. పురాతన కాషీపూర్ ప్రాంతాన్ని ఆ గోవిషాణ్‌తో అనుసంధానిస్తూ చరిత్రకారులు పరిశోధనలు చేస్తున్నారు.

ఇక్కడ లభించిన పెయింటెడ్ గ్రే వేర్ అనే ప్రత్యేక రకం మట్టి పాత్రలు కూడా పరిశోధకుల ఆసక్తిని పెంచాయి. ఉత్తర భారతదేశంలోని మహాభారత కాలంతో అనుసంధానించి అధ్యయనం చేసే పురావస్తు సంస్కృతుల్లో వీటికి ప్రాధాన్యం ఉంది.

మహాభారత రహస్యం బయటపడుతుందా?

ఈ తవ్వకాలతో ద్రోణాచార్యుడి ఆశ్రమం ఇదేనని లేదా పాండవులు ఇక్కడే విద్య నేర్చుకున్నారని వెంటనే చెప్పలేం. కానీ ఈ ప్రాంతంలో వేల సంవత్సరాలుగా మానవ నివాసాలు, నిర్మాణాలు కొనసాగినట్లు ఆధారాలు లభిస్తున్నాయి.

తాజా తవ్వకాలు పూర్తయ్యాక మరిన్ని వివరాలు వెల్లడయ్యే అవకాశం ఉంది. మహాభారతంలో చెప్పిన ప్రదేశాలకు, వాస్తవ చరిత్రకు మధ్య ఉన్న సంబంధాలను తెలుసుకోవడానికి ఈ పరిశోధనలు ఉపయోగపడనున్నాయి.

పురాణ కథనాల వెనుక దాగి ఉన్న చారిత్రక ఆనవాళ్లు ఏమైనా ఉన్నాయా? అన్న ప్రశ్నకు ఈ తవ్వకాలు మరింత ఆసక్తిని పెంచుతున్నాయి.