Children Wetting the Bed: పిల్లలు మంచం తడుపుతున్నారా? అది జబ్బు కాదు..నిపుణుల సూచనలు ఇవే..

Children Wetting the Bed: చిన్న పిల్లలు రాత్రిపూట నిద్రలో మంచం తడపడం అనేది చాలా మంది తల్లిదండ్రులను ఆందోళనకు గురిచేసే అంశం. వైద్య భాషలో దీనిని నాక్టర్నల్ ఎన్యూరెసిస్ అని పిలుస్తారు. సాధారణంగా ఐదేళ్ల వయస్సు వచ్చేసరికి పిల్లలు ఈ అలవాటు నుండి బయటపడతారు. అయితే ఆ వయస్సు తర్వాత కూడా ఈ సమస్య కొనసాగుతుంటే కొన్ని ప్రత్యేక జాగ్రత్తలు అవసరమని వైద్య నిపుణులు చెబుతున్నారు.

పిల్లలు నిద్రలో మూత్ర విసర్జన ఎందుకు చేస్తారు?

గాఢ నిద్ర: పిల్లలు చాలా గాఢ నిద్రలో ఉన్నప్పుడు, మూత్రాశయం నిండిందనే సంకేతాన్ని మెదడు గుర్తించలేకపోవచ్చు.

వంశపారంపర్యం: తల్లిదండ్రులలో ఎవరికైనా చిన్నప్పుడు ఈ సమస్య ఉంటే, అది పిల్లలకు కూడా వచ్చే అవకాశం ఉంది.

కలలను నిజమని నమ్మడం: పిల్లలు కలలో తాము టాయిలెట్‌లో ఉన్నట్లు భావించి, నిద్రలోనే మూత్ర విసర్జన చేసేస్తుంటారు.

ఈ సమస్యను అధిగమించే మార్గాలు:

పిల్లలకు చిన్న చిన్న అలవాట్లు నేర్పడం ద్వారా ఈ సమస్యను దూరం చేయవచ్చు.

ద్రవ పదార్థాల నియంత్రణ: రోజంతా పిల్లలకు తగినంత నీరు, పానీయాలు ఇవ్వాలి. కానీ, పడుకోవడానికి రెండు గంటల ముందు నుండి ద్రవ పదార్థాలను వీలైనంత వరకు తగ్గించాలి.

పడుకునే ముందు టాయిలెట్: నిద్రపోయే ముందు తప్పనిసరిగా మూత్ర విసర్జన చేయించే అలవాటు చేయాలి. ఇది వారి మూత్రాశయంపై ఒత్తిడిని తగ్గిస్తుంది.

డైపర్లకు స్వస్తి చెప్పండి: ఐదేళ్లు దాటిన పిల్లలకు డైపర్లు వాడటం మంచిది కాదు. డైపర్ ఉందనే ధీమాతో మెదడు మేల్కొనడానికి ప్రయత్నించదు. అదే డైపర్ లేకపోతే, మంచం తడిచినప్పుడు ఆ తడికి

మెదడు వెంటనే అప్రమత్తమవుతుంది.

మొదటి రోజు రాత్రి 1 గంట ప్రాంతంలో బిడ్డను నిద్రలేపి టాయిలెట్‌కు తీసుకెళ్లాలి.

తర్వాత రెండు రోజులు ప్రతి మూడు గంటలకు ఒకసారి మేల్కొల్పాలి.

ఇలా క్రమంగా అలవాటు చేస్తే, ఆరో రోజు నాటికి బిడ్డ తనంతట తానుగా మేల్కొనే అవకాశం ఉంటుంది.

తల్లిదండ్రులు గుర్తుంచుకోవాల్సిన ముఖ్య విషయాలు

మంచం తడిపినందుకు పిల్లలను తిట్టడం లేదా ఇతరుల ముందు అవమానించడం చేయకూడదు. ఇది వారిలో మానసిక ఒత్తిడిని పెంచి సమస్యను మరింత తీవ్రం చేస్తుంది. వారికి ప్రేమతో అర్థమయ్యేలా చెప్పాలి.

వైద్యుడిని ఎప్పుడు సంప్రదించాలి?

మీ బిడ్డ వయస్సు 7 ఏళ్లు దాటినా సమస్య తగ్గకపోతే.

గతంలో ఈ సమస్య లేకపోయినా, అకస్మాత్తుగా మంచం తడపడం మొదలుపెడితే.

మూత్ర విసర్జన చేసేటప్పుడు నొప్పిగా ఉందని చెబితే.

నిర్లక్ష్యం చేయకుండా సరైన శిక్షణ, అవసరమైతే వైద్య సలహా తీసుకోవడం ద్వారా ఈ సమస్యను సులభంగా పరిష్కరించవచ్చు.