Antibiotics: యాంటీబయోటిక్స్ వాడుతున్నారా.?ఇవి తెలుసుకోండి

Antibiotics: యాంటీబయోటిక్స్‌ను (Antibiotics) ఎక్కువ కాలం లేదా తరచుగా వాడితే, అది మీ ఆరోగ్యంపై అనేక రకాల ప్రతికూల ప్రభావాలను చూపుతుంది. యాంటీబయోటిక్స్‌ను వైద్యుల సలహా లేకుండా వాడటం అత్యంత ప్రమాదకరం.యాంటీబయోటిక్స్‌ను ఎల్లప్పుడూ డాక్టర్ ప్రిస్క్రిప్షన్ (చీటి) మేరకే వాడాలి. డాక్టర్ సూచించినంత కాలం, పూర్తి మోతాదులో వాడటం తప్పనిసరి. లక్షణాలు తగ్గినప్పటికీ మధ్యలో ఆపకూడదు.

యాంటీబయోటిక్స్ అతిగా వాడటం వల్ల కలిగే ప్రధాన సమస్యలు ఏంటంటే.?

1. యాంటీబయోటిక్ నిరోధకత

మనం యాంటీబయోటిక్స్‌ను తరచుగా లేదా అసంపూర్తిగా వాడినప్పుడు (కోర్సు పూర్తి చేయకుండా), బ్యాక్టీరియా మందుల నుండి తప్పించుకోవడానికి వాటిని తట్టుకునే శక్తిని (Resistance) పెంచుకుంటుంది.

భవిష్యత్తులో నిజంగా ఏదైనా తీవ్రమైన ఇన్ఫెక్షన్ సోకినప్పుడు, గతంలో పనిచేసిన యాంటీబయోటిక్స్ ఇకపై పనిచేయవు. దీనివల్ల సాధారణ ఇన్ఫెక్షన్లు కూడా ప్రాణాంతకంగా మారే అవకాశం ఉంటుంది. దీనిని "సూపర్‌బగ్స్" (Superbugs) అంటారు.

2. పేగు ఆరోగ్య సమస్యలు

యాంటీబయోటిక్స్ మన శరీరంలోని మంచి బ్యాక్టీరియాను కూడా చంపుతాయి.

జీర్ణక్రియకు ,పోషకాల శోషణకు సహాయపడే మంచి బ్యాక్టీరియా తగ్గిపోవడం వల్ల అజీర్ణం, పొట్ట ఉబ్బరం, విరేచనాలు (డయేరియా) వంటి సమస్యలు వస్తాయి.

మంచి బ్యాక్టీరియా లేకపోవడంతో, క్లోస్ట్రిడియం డిఫిసిల్ ) వంటి హానికరమైన బ్యాక్టీరియా అతిగా పెరిగి తీవ్రమైన విరేచనాలకు దారితీస్తుంది.

3. అలెర్జీ ప్రతిచర్యలు

దద్దుర్లు (Rashes), దురద, శ్వాస తీసుకోవడంలో ఇబ్బంది లేదా అనాఫిలాక్సిస్ వంటి తీవ్రమైన అలెర్జీలు రావచ్చు. ఇవి కొన్ని రకాల యాంటీబయోటిక్స్‌తో ముడిపడి ఉంటాయి.

4. కాలేయం, మూత్రపిండాలపై ప్రభావం

కొన్ని యాంటీబయోటిక్స్‌ను అధిక మోతాదులో లేదా ఎక్కువ కాలం వాడితే, అవి కాలేయం , మూత్రపిండాల పనితీరును దెబ్బతీసే అవకాశం ఉంది.

5. ఫంగల్ ఇన్ఫెక్షన్లు

మంచి బ్యాక్టీరియా చనిపోవడం వల్ల, ఫంగస్ (ఈస్ట్) అనియంత్రితంగా పెరిగి, నోటిలో (Thrush) లేదా జననేంద్రియాలలో ఫంగల్ ఇన్ఫెక్షన్లకు (Yeast Infections) దారితీయవచ్చు.