Burning Sensation in Your Feet at Night: రాత్రివేళ పాదాల్లో మంటలా? ఈ తీవ్ర సమస్యల సంకేతం కావచ్చు!

Burning Sensation in Your Feet at Night: చాలామంది రాత్రి పడుకునే సమయంలో పాదాల అరిభాగంలో తీవ్రమైన మంట, తిమ్మిర్లు, సూదులతో గుచ్చినట్లు ఉండే నొప్పి లేదా విపరీతమైన వేడిని అనుభవిస్తుంటారు. చాలామంది దీనిని సాధారణ శరీర వేడి అనుకుని కొట్టిపారేస్తుంటారు. అయితే వైద్యశాస్త్రంలో దీనిని బర్నింగ్ ఫీట్ సిండ్రోమ్ అని పిలుస్తారు. ఇది కేవలం బాహ్య సమస్య మాత్రమే కాదు; శరీరంలో అంతర్గతంగా తలెత్తే తీవ్ర ఆరోగ్య సమస్యల హెచ్చరిక కావచ్చునని వైద్య నిపుణులు స్పష్టం చేస్తున్నారు.

పాదాల్లో మంటలకు ప్రధాన కారణాలు

డయాబెటిక్ న్యూరోపతి

పాదాల్లో మంటలు రావడానికి ప్రధాన కారణాల్లో మధుమేహం అత్యంత ముఖ్యమైనది. రక్తంలో చక్కెర స్థాయిలు ఎక్కువ కాలం పాటు నియంత్రణలో లేకుండా పెరిగిపోతే, అవి కాళ్లలోని సూక్ష్మ నాడీ వ్యవస్థపై తీవ్ర ప్రభావం చూపుతాయి. దీనివల్ల నరాలు దెబ్బతిని (డయాబెటిక్ న్యూరోపతి), ముఖ్యంగా రాత్రివేళల్లో పాదాలు తిమ్మిర్లు పట్టడం, స్పర్శ తగ్గడం, తీవ్రమైన మంటలు రావడం జరుగుతుంది.

విటమిన్ B12 లోపం

శరీరంలో నాడీ వ్యవస్థ సక్రమంగా పనిచేయడానికి, నరాల రక్షణ పొర బలంగా ఉండటానికి విటమిన్ B12 అత్యవసరం. శరీరంలో ఈ విటమిన్ లోపిస్తే నరాల బలహీనత తలెత్తి పాదాల అడుగుభాగంలో మంటలు, చక్కిలిగింతలు లేదా సూదులు గుచ్చినట్లు అనిపిస్తుంది.

థైరాయిడ్ - మూత్రపిండాల సమస్యలు

థైరాయిడ్ గ్రంథి పనితీరు మందగించినప్పుడు (హైపోథైరాయిడిజం) శరీర జీవక్రియలు దెబ్బతిని నరాలపై ఒత్తిడి పడుతుంది. అలాగే మూత్రపిండాల (కిడ్నీ) పనితీరు క్షీణించినప్పుడు శరీరంలోని మలినాలు, వ్యర్థాలు రక్తం ద్వారా సరిగ్గా బయటకు వెళ్లక నాడీ వ్యవస్థను దెబ్బతీస్తాయి. ఇది కూడా పాదాల మంటలకు దారితీస్తుంది.

మితిమీరిన మద్యం అలవాటు

ఎక్కువ కాలం మితిమీరి మద్యం సేవించే వారిలో పోషకాహార లోపం ఏర్పడటంతో పాటు నరాలు దెబ్బతినే ప్రమాదం ఉంది. దీనివల్ల పాదాలలో తీవ్రమైన మంటలు, స్పర్శ కోల్పోవడం వంటి సమస్యలు మొదలవుతాయి.

ఎప్పుడు వైద్యులను సంప్రదించాలి?

పాదాల మంటలు ఒకటి రెండు రోజులు కాకుండా నిరంతరం వేధిస్తుంటే ఏమాత్రం నిర్లక్ష్యం చేయరాదు. సొంత వైద్యం లేదా పెయిన్ కిల్లర్ల జోలికి వెళ్లకుండా వెంటనే వైద్యులను సంప్రదించాలి.

రక్తంలో చక్కెర స్థాయిలు

విటమిన్ B12 స్థాయిలు

థైరాయిడ్ ప్రొఫైల్

కిడ్నీ పనితీరు పరీక్షలు

అవసరమైతే నరాల పనితీరును అంచనా వేసే ప్రత్యేక పరీక్షలు

పాదాలపై పుండ్లు, వాపులు, రంగు మారడం లేదా ఇన్ఫెక్షన్ లక్షణాలు కనిపిస్తే తక్షణమే వైద్య సహాయం తీసుకోవాలి. సమస్యను ప్రాథమిక దశలోనే గుర్తించి చికిత్స తీసుకుంటే నరాల నష్టాన్ని సమర్థవంతంగా అరికట్టవచ్చు.