Hepatitis B Cause Liver Cancer: సిర్రోసిస్ రాకముందే ..హెపటైటిస్ బి లివర్ క్యాన్సర్‌కు కారణమవుతుందా?

Hepatitis B Cause Liver Cancer: లివర్ క్యాన్సర్ అనగానే సాధారణంగా మనందరికీ గుర్తుకొచ్చేది సిర్రోసిస్! అంటే కాలేయం పూర్తిగా దెబ్బతిన్న తర్వాతే క్యాన్సర్ వస్తుందని చాలామంది భావిస్తుంటారు. కానీ, సిర్రోసిస్ వ్యాధి లక్షణాలు అసలు బయటపడకుండానే హెపటైటిస్-బి వల్ల నేరుగా లివర్ క్యాన్సర్ వచ్చే ప్రమాదం ఉందా? వైద్య నిపుణులు దీని గురించి ఏం చెబుతున్నారో ఇప్పుడు తెలుసుకుందాం.

హెపటైటిస్-బి అనేది ఒక ప్రమాదకరమైన వైరల్ ఇన్ఫెక్షన్. సాధారణంగా కాలేయ సమస్యలు ముదిరి సిర్రోసిస్‌గా మారినప్పుడు క్యాన్సర్ ముప్పు పెరుగుతుంది. కానీ హెపటైటిస్-బి విషయంలో పరిస్థితి వేరుగా ఉంటుంది. ఈ వైరస్ మానవ శరీరంలోకి ప్రవేశించినప్పుడు, అది నేరుగా మన కాలేయ కణాలలోని డీఎన్‌ఏతో కలిసిపోతుంది.

ఇలా వైరస్ డీఎన్‌ఏ కాలేయ కణాలలో కలవడం వల్ల, కాలేయం గట్టిపడటం లేదా దెబ్బతినడం (సిర్రోసిస్) జరగక ముందే కణాలలో జన్యుపరమైన మార్పులు (జెనెటిక్ మ్యుటేషన్స్) వేగంగా జరుగుతాయి. దీనివల్ల కాలేయం సాధారణంగా కనిపిస్తున్నప్పటికీ, లోపల నేరుగా హెపటోసెల్యులార్ కార్సినోమా అనే లివర్ క్యాన్సర్ గడ్డలు ఏర్పడే అవకాశం ఉందని కాలేయ మార్పిడి శస్త్రచికిత్స నిపుణులు స్పష్టం చేస్తున్నారు.

అందుకే హెపటైటిస్-బి ఉన్న రోగులు కాలేయం బానే ఉందని నిర్లక్ష్యం చేయకూడదు. ముఖ్యంగా హెపటైటిస్-బి బాధితులు క్రమం తప్పకుండా ఆల్ట్రాసౌండ్ స్కాన్,ఆల్ఫా-ఫెటోప్రోటీన్ (AFP) రక్త పరీక్షలు చేయించుకోవడం చాలా అవసరం. ముందస్తు స్క్రీనింగ్ ద్వారా క్యాన్సర్ ప్రాథమిక దశలోనే ఉందో లేదో గుర్తించి ప్రాణాలను కాపాడుకోవచ్చు.

సకాలంలో టీకాలు వేయించుకోవడం, హెపటైటిస్-బి వ్యాధి సోకితే సరైన వైద్య సలహాతో మందులు వాడటం ద్వారా ఈ ప్రమాదాన్ని అరికట్టవచ్చు.