Hands and Feet Feel Numb in Winter: చలికాలంలో చేతులు, కాళ్లు తిమ్మిర్లు వస్తున్నాయా? తస్మాత్ జాగ్రత్త!

Hands and Feet Feel Numb in Winter: చలికాలం మొదలవ్వగానే ఉదయం, సాయంత్రం వేళల్లో చేతులు, కాళ్ల వేళ్లు మొద్దుబారడం లేదా జలదరింపు రావడం సాధారణంగా చూస్తుంటాం. అయితే దీనిని కేవలం చలి ప్రభావమే కదా అని నిర్లక్ష్యం చేయడం ప్రమాదకరమని వైద్యులు హెచ్చరిస్తున్నారు.

తిమ్మిర్లు ఎందుకు వస్తాయి?

చలికాలంలో మన శరీరం ఒక ప్రత్యేక రక్షణ వ్యవస్థను కలిగి ఉంటుంది. మెదడు, గుండె వంటి ముఖ్యమైన అవయవాలను వెచ్చగా ఉంచడానికి, శరీరం బాహ్య అవయవాలైన చేతులు, కాళ్ల రక్త ప్రవాహాన్ని తగ్గిస్తుంది. దీనివల్ల వేళ్లు తిమ్మిరిగా అనిపిస్తాయి.

నరాల సమస్యలు: ఒకవేళ ఈ తిమ్మిర్లు చలి లేనప్పుడు కూడా వస్తున్నా, లేదా తరచుగా ఇబ్బంది పెడుతున్నా అది నరాల బలహీనతకు ముందస్తు సంకేతం కావచ్చు.

ఎప్పుడు ప్రమాదకరం?

కేవలం చలి వల్ల వచ్చే తిమ్మిర్లు కాకుండా, కింద పేర్కొన్న లక్షణాలు ఉంటే వెంటనే అలర్ట్ అవ్వాలి..

తిమ్మిర్లతో పాటు విపరీతమైన మంట లేదా నొప్పి కలగడం.

వస్తువులను పట్టుకోవడంలో బలహీనత

నడవడానికి ఇబ్బంది పడటం.

విటమిన్ బి12 లోపం, మధుమేహం లేదా నరాలపై ఒత్తిడి ఉండటం.

నివారణ మార్గాలు - చిట్కాలు

ఈ సమస్య నుండి ఉపశమనం పొందేందుకు నిపుణులు ఈ క్రింది జాగ్రత్తలు సూచిస్తున్నారు:

వెచ్చదనం ముఖ్యం: చేతులకు గ్లౌజులు, కాళ్లకు సాక్స్ ధరించాలి. తరచుగా గోరువెచ్చని నీటితో చేతులు, కాళ్లను కడగడం వల్ల రక్త ప్రసరణ మెరుగుపడుతుంది.

ఆహారం: విటమిన్ బి12 పుష్కలంగా ఉండే సమతుల్య ఆహారాన్ని తీసుకోవాలి.

వ్యాయామం: రోజూ తేలికపాటి సాగదీత వ్యాయామాలు చేయడం వల్ల నరాల పనితీరు మెరుగుపడుతుంది.

పరిశుభ్రత: చర్మం పొడిబారకుండా, పాదాలను, చేతులను శుభ్రంగా ఉంచుకోవాలి.

ఒకవేళ ఈ సమస్య దీర్ఘకాలంగా వేధిస్తుంటే, ఇంట్లోనే చికిత్స చేసుకోకుండా నిపుణులైన వైద్యుడిని సంప్రదించి అవసరమైన పరీక్షలు చేయించుకోవడం ఉత్తమం.