Extreme Fatigue and Irritability After Childbirth: ప్రసవం తర్వాత విపరీతమైన అలసట, చిరాకా? ఈ సమస్యే కావచ్చు..

Extreme Fatigue and Irritability After Childbirth: ప్రసవం తర్వాత ప్రతి స్త్రీ జీవితంలోనూ అనేక శారీరక, హార్మోన్ల మార్పులు చోటుచేసుకుంటాయి. బిడ్డ పుట్టిన కొత్తలో తీవ్రమైన అలసట, మూడ్ స్వింగ్స్, బరువు పెరగడం, నిద్రలేమి వంటివి సర్వసాధారణం అని చాలామంది అనుకుంటారు. కానీ ఇవే లక్షణాలు థైరాయిడ్ సమస్యకు, ముఖ్యంగా ప్రసవానంతర థైరాయిడైటిస్‌కి సంకేతం కావచ్చు. ప్రసవించిన మొదటి సంవత్సరంలో చాలా మంది మహిళల్లో ఈ సమస్య వస్తుంది. ఇవి కొత్తగా తల్లి అయినవారికి ఎదురయ్యే సాధారణ రోజువారీ సమస్యల మాదిరిగానే ఉండటం వల్ల, చాలామంది దీనిని గుర్తించకపోవడంతో వ్యాధి నిర్ధారణ కాకుండానే ఉండిపోతోంది.

రెండు దశల్లో దాడి చేసే థైరాయిడ్..

ప్రసవానంతర థైరాయిడైటిస్ సాధారణంగా రెండు వేర్వేరు దశల్లో వస్తుంది..

హైపర్‌థైరాయిడిజం: ప్రారంభంలో థైరాయిడ్ గ్రంథి అతి చురుకుగా మారుతుంది. దీనివల్ల విపరీతమైన ఆందోళన, వేగంగా హృదయ స్పందనలు, చిరాకు, కారణం లేకుండానే బరువు తగ్గిపోవడం వంటి లక్షణాలు కనిపిస్తాయి.

హైపోథైరాయిడిజం: మొదటి దశ దాటిన తర్వాత థైరాయిడ్ పనితీరు తీవ్రంగా మందగిస్తుంది. దీనివల్ల విపరీతమైన అలసట, విచారం లేదా డిప్రెషన్, మలబద్ధకం, చర్మం పొడిబారడం, చలిని తట్టుకోలేకపోవడం, ఏకాగ్రత లోపించడం వంటి లక్షణాలు కనిపిస్తాయి.

నిపుణులు ఏమంటున్నారు?

ఢిల్లీలోని మధుకర్ రెయిన్‌బో చిల్డ్రన్స్ హాస్పిటల్, ప్రసూతి మరియు గైనకాలజీ సీనియర్ కన్సల్టెంట్ డాక్టర్ సాక్షి గోయల్ వివరిస్తూ.. "చాలా మంది మహిళల్లో ఈ సమస్య కాలక్రమేణా దానంతట అదే తగ్గిపోయినప్పటికీ, కొందరిలో మాత్రం దీర్ఘకాలిక చికిత్స అవసరమవుతుంది. అందువల్ల సకాలంలో రక్త పరీక్షలు చేయించుకోవడం చాలా ముఖ్యం. TSH, ఫ్రీ T4, థైరాయిడ్ యాంటీబాడీ పరీక్షల** ద్వారా థైరాయిడ్ పనితీరును నిర్ధారించవచ్చు. ముందుగానే దీనిని గుర్తిస్తే, త్వరగా చికిత్స ప్రారంభించి దీర్ఘకాలిక ఆరోగ్య సమస్యలను నివారించవచ్చు" అని తెలిపారు.

పాలిచ్చే తల్లులు గుర్తుంచుకోవాల్సిన విషయాలు..

పాలిచ్చే తల్లులలో ఈ సమస్య వస్తే కంగారు పడాల్సిన పనిలేదు. వైద్యులు సూచించే చాలా రకాల థైరాయిడ్ మందులు పాలిచ్చే సమయంలో సురక్షితమైనవే. సరైన చికిత్స తీసుకోవడం వల్ల తల్లి ఆరోగ్యం, శక్తి పుంజుకుని.. బిడ్డను సరిగ్గా చూసుకోవడానికి, పాలు ఇవ్వడానికి వీలవుతుంది.

ఎవరు ముందస్తు పరీక్షలు చేయించుకోవాలి?

గతంలో థైరాయిడ్ సమస్యలు ఉన్నవారు,

కుటుంబంలో ఎవరికైనా థైరాయిడ్ లేదా ఆటోఇమ్యూన్ వ్యాధుల చరిత్ర ఉన్నవారు,

గత కాన్పు సమయంలో ప్రసవానంతర థైరాయిడైటిస్‌ను ఎదుర్కొన్నవారు.. తప్పనిసరిగా డాక్టర్‌తో మాట్లాడి థైరాయిడ్ పరీక్షలు చేయించుకోవాలి. ప్రసవం తర్వాత వచ్చే అలసట, నిరాశలను కేవలం సాధారణ కాన్పు సమస్యలుగా కొట్టిపారేయకుండా, సకాలంలో బ్లడ్ టెస్టులు చేయించుకుంటే తల్లి, బిడ్డ ఇద్దరి ఆరోగ్యానికీ మంచిది.