Feeling Tired : చిన్న పనికే అలసిపోతున్నారా..? లైట్ తీసుకోకండి.. ఆ వ్యాధులకు సంకేతం కావచ్చు

Feeling Tired : ఈ రోజుల్లో చాలా మంది చిన్న పనులకే అలసట, నీరసంతో బాధపడుతున్నారు. నాలుగు అడుగులు నడిచినా, చిన్నపాటి పని చేసినా త్వరగా అలసిపోతున్నారు. సరిగ్గా తినకపోవడం, జ్వరం లేదా జలుబు వంటి సాధారణ కారణాల వల్ల అలసట రావడం సహజం. కానీ ఎటువంటి కారణం లేకుండా తరచుగా అలసటగా అనిపిస్తే, అది శరీరంలో అంతర్లీనంగా ఉన్న ఆరోగ్య సమస్యలకు సంకేతం కావచ్చు. ఈ లక్షణాలు ఏ వ్యాధులకు సంబంధించినవి, వాటిని ఎలా గుర్తించాలో ఇప్పుడు తెలుసుకుందాం.

అలసటకు ప్రధాన కారణాలు

రక్తహీనత : ఏదైనా పని చేసిన తర్వాత త్వరగా అలసిపోతున్నారంటే అది రక్తహీనతకు సంకేతం కావచ్చు. రక్తంలో ఎర్ర రక్త కణాలు తక్కువగా ఉన్నప్పుడు, ఊపిరితిత్తుల నుండి శరీరంలోని అన్ని భాగాలకు ఆక్సిజన్‌ను చేరవేయడంలో ఇబ్బందులు ఎదురవుతాయి. దీని వల్ల శరీరానికి తగినంత ఆక్సిజన్ అందక త్వరగా అలసట వస్తుంది.

హైపోథైరాయిడిజం: శరీరంలో థైరాయిడ్ హార్మోన్లు తగ్గినప్పుడు కూడా అలసట మొదలవుతుంది. హార్మోన్లు తక్కువగా విడుదల కావడం వల్ల మెటబాలిజం మందగిస్తుంది. ఫలితంగా కండరాలలో బలహీనత, అలసట వంటి లక్షణాలు కనిపిస్తాయి.

టైప్ 2 డయాబెటిస్: మధుమేహంతో బాధపడేవారు త్వరగా అలసిపోతారు. టైప్ 2 డయాబెటిస్ ఉన్నవారు తమ శరీరంలోని గ్లూకోజ్‌ను సరిగ్గా ఉపయోగించుకోలేరు. ఇది అలసటకు దారితీస్తుంది.

డిప్రెషన్: మానసిక ఒత్తిడి, డిప్రెషన్ కూడా అలసటకు ఒక ప్రధాన కారణం. శారీరక శ్రమ కంటే మానసిక ఒత్తిడి కారణంగా అలసిపోయే వారి సంఖ్య ఇటీవల కాలంలో పెరుగుతోంది.

ఆర్థరైటిస్: ఆర్థరైటిస్ సమస్య ఉన్నవారిలో కూడా అలసట ఎక్కువగా ఉంటుంది. ఇది శరీరంలోని ఆరోగ్యకరమైన కణాలపై దాడి చేసి, ఎముకలను, కణాలను ప్రభావితం చేస్తుంది. ఫలితంగా త్వరగా అలసట వస్తుంది.

నిద్రలేమి: సరిగ్గా నిద్ర లేకపోవడం అలసటకు ప్రధాన కారణం. రాత్రిపూట సరైన నిద్ర లేకపోతే, రోజంతా అలసటగా, నీరసంగా అనిపిస్తుంది.

తరచుగా అలసటగా అనిపిస్తే, దానిని తేలికగా తీసుకోకుండా వెంటనే వైద్యుడిని సంప్రదించి తగిన పరీక్షలు చేయించుకోవాలని ఆరోగ్య నిపుణులు సూచిస్తున్నారు. సరైన సమయంలో సమస్యను గుర్తించడం ద్వారా తీవ్రమైన అనారోగ్యాల నుండి రక్షించుకోవచ్చు.