Sleep During Pregnancy: ప్రెగ్నెన్సీ సమయంలో ఎన్ని గంటలు నిద్రపోవాలి.?

Sleep During Pregnancy: ప్రెగ్నెన్సీ అనేది ఒక మహిళ జీవితంలో అత్యంత మధురమైన , కీలకమైన సమయం. ఈ సమయంలో శారీరక మార్పుల వల్ల అలసటగా అనిపించడం సహజం. అందుకే, గర్భిణీ స్త్రీలకు తగినంత విశ్రాంతి చాలా అవసరం. ఆరోగ్యకరమైన ప్రసవం కోసం, పుట్టబోయే బిడ్డ ఎదుగుదల కోసం తల్లికి ప్రతిరోజూ కనీసం 7 నుండి 9 గంటల గాఢ నిద్ర అవసరమని ఆరోగ్య నిపుణులు సూచిస్తున్నారు.

చాలామంది గర్భిణీలకు ఏ వైపు తిరిగి పడుకోవాలనే సందేహం ఉంటుంది. నిపుణుల అభిప్రాయం ప్రకారం, ఎడమ వైపుకు తిరిగి పడుకోవడం (Sleeping on the left side) అత్యంత ఉత్తమం. ఇలా పడుకోవడం వల్ల గర్భాశయానికి రక్త ప్రసరణ సాఫీగా జరుగుతుంది. తద్వారా బిడ్డకు తగినన్ని పోషకాలు, ఆక్సిజన్ అందుతాయి. నిద్రలో అసౌకర్యంగా అనిపించకుండా ఉండేందుకు, కాళ్ల మధ్యలో,పొట్ట కింద సపోర్ట్ కోసం 'ప్రెగ్నెన్సీ పిల్లోస్' ఉపయోగించడం వల్ల మంచి ఫలితం ఉంటుంది.

మంచి నిద్ర కోసం మనం తీసుకునే ఆహారం కూడా కీలక పాత్ర పోషిస్తుంది. రాత్రి సమయంలో అతిగా మసాలాలు ఉన్న ఆహారాలు తీసుకోవడం వల్ల ఎసిడిటీ లేదా గుండెల్లో మంట వచ్చే అవకాశం ఉంది, ఇది నిద్రను పాడు చేస్తుంది. అలాగే, కాఫీ, టీ వంటి కెఫీన్ అధికంగా ఉండే పానీయాలను సాయంత్రం తర్వాత తగ్గించాలి. వీటికి బదులుగా రాత్రి పడుకునే ముందు ఒక గ్లాసు గోరువెచ్చని పాలు తీసుకోవడం వల్ల నిద్ర బాగా పడుతుంది.

నేటి డిజిటల్ యుగంలో నిద్రలేమికి ప్రధాన కారణం మొబైల్ ఫోన్లు ,ల్యాప్‌టాప్‌లు. నిద్రకు కనీసం ఒక గంట ముందు నుండే ఎలక్ట్రానిక్ పరికరాలను పక్కన పెట్టేయాలి. స్క్రీన్ల నుండి వచ్చే బ్లూ లైట్ నిద్రకు కారణమయ్యే మెలటోనిన్ హార్మోన్‌ను దెబ్బతీస్తుంది. ఫోన్‌కు బదులుగా ఏదైనా మంచి పుస్తకాన్ని చదవడం లేదా మెల్లని సంగీతాన్ని వినడం అలవాటు చేసుకోవాలి.