Set Dosa at Home: హోటల్ స్టైల్‌లో ఇంట్లోనే సెట్ దోస ఎలా తయారు చేసుకోవాలి?

Set Dosa at Home: హోటల్ స్టైల్‌లో సెట్ దోస తయారు చేసుకోవడం చాలా సులభం. దీనికి ప్రత్యేకంగా కొన్ని చిట్కాలు పాటిస్తే, ఇంట్లోనే మెత్తగా, పుల్లపుల్లగా ఉండే స్పాంజ్ దోశలను తయారు చేసుకోవచ్చు.

కావాల్సిన పదార్థాలు

అటుకులు: 1 కప్పు (మందపాటి అటుకులు), మినపప్పు: ½ కప్పు, ఇడ్లీ రవ్వ/ బియ్యం: 2 కప్పులు, మెంతులు: 1 టీస్పూన్, ఉప్పు: రుచికి సరిపడా, వంట సోడా: చిటికెడు

తయారీ విధానం

ముందుగా ఒక గిన్నెలో మినపప్పు, మెంతులు, ఇడ్లీ రవ్వ లేదా బియ్యం వేసి శుభ్రంగా కడగాలి. వీటిని కనీసం 6 నుంచి 8 గంటల పాటు నానబెట్టాలి. అటుకులను మాత్రం దోశ పిండి రుబ్బడానికి అరగంట ముందు నానబెడితే సరిపోతుంది. నానిన మినపప్పు, మెంతులను మెత్తగా, నున్నగా రుబ్బుకోవాలి. ఆ తర్వాత నానబెట్టిన బియ్యం లేదా ఇడ్లీ రవ్వను కూడా అదే మిక్సీలో వేసి మెత్తగా రుబ్బుకోవాలి. చివరిగా, నానబెట్టిన అటుకులను కూడా వేసి, అన్నింటినీ కలిపి ఒకే గిన్నెలోకి తీసుకోవాలి. పిండిలో కొద్దిగా ఉప్పు వేసి బాగా కలపాలి. దీన్ని మూత పెట్టి కనీసం 8 నుంచి 10 గంటల పాటు వెచ్చని ప్రదేశంలో పులియబెట్టాలి. ఈ పులియబెట్టే ప్రక్రియతోనే దోశలు మెత్తగా, స్పాంజీగా వస్తాయి. పులిసిన పిండిని మరోసారి బాగా కలుపుకోవాలి. అవసరమైతే కొద్దిగా నీరు పోసి జారుగా ఉండేలా చూసుకోవాలి. ఇప్పుడు స్టవ్ మీద పెనం పెట్టి, వేడయ్యాక ఒక గరిటెడు పిండిని వేసి చిన్నగా, మందంగా వేసుకోవాలి. సెట్ దోశను ఎక్కువగా తిప్పాల్సిన అవసరం లేదు, ఒకవైపు మాత్రమే కాల్చాలి. పెనంపై మూత పెట్టి, దోశను మీడియం మంటపై కాల్చుకోవాలి. మధ్యలో కొద్దిగా నూనె వేసుకోవచ్చు. ఈ దోశ చాలా త్వరగా ఉడుకుతుంది. బంగారు రంగులోకి రాగానే పెనంపై నుంచి తీసి, వేడివేడిగా వడ్డించాలి.

చిట్కాలు

అటుకులు వేయడం వల్ల దోశలు దూదిలా మెత్తగా, స్పాంజీగా వస్తాయి. పిండిని సరిగా పులియబెట్టడం చాలా ముఖ్యం. చలికాలంలో త్వరగా పులియకపోతే, కొద్దిగా పెరుగు వేసి వేడి ప్రదేశంలో ఉంచాలి. సెట్ దోశ మందంగా ఉండాలి. పలచగా వేస్తే కరకరలాడుతూ వస్తుంది, అది సెట్ దోశ కాదు. కొందరు వంట సోడా వేస్తారు, కానీ సరిగ్గా పులిసిన పిండికి ఇది అవసరం లేదు. ఒకవేళ సరిగా పులియకపోతే, వేసుకోవచ్చు. ఈ సెట్ దోశలను కొబ్బరి చట్నీ, ఆలూ కూర లేదా సాంబార్‌తో తింటే రుచి అద్భుతంగా ఉంటుంది.