World Idli Day Today: ఫెవరెట్ బ్రేక్ ఫాస్ట్... ఇవాళ వరల్డ్ ఇడ్లీ డే..

World Idli Day Today: వేడి వేడి ఇడ్లీని చూస్తే ఎవరికైనా నోరూరాల్సిందే! అది సామాన్యుడి ఫేవరెట్ టిఫిన్ మాత్రమే కాదు, ప్రపంచవ్యాప్తంగా గుర్తింపు పొందిన ఒక సూపర్ ఫుడ్. అవును, ఈరోజు మార్చి 30.. మనందరి ప్రియమైన ఇడ్లీకి ఒక ప్రత్యేకమైన రోజు. అదే 'ప్రపంచ ఇడ్లీ దినోత్సవం'.

ఈ 'వరల్డ్ ఇడ్లీ డే' వేడుకలు 2015లో తమిళనాడు రాజధాని చెన్నైలో మొట్టమొదటిసారిగా ప్రారంభమయ్యాయి. అప్పటి నుంచి ఏటా మార్చి 30న దక్షిణ భారతీయుల ఫేవరెట్ బ్రేక్‌ఫాస్ట్ అయిన ఇడ్లీ ప్రాముఖ్యాన్ని చాటడానికి ఈ వేడుకను నిర్వహిస్తున్నారు. దేశ విదేశాల్లో కూడా ఇడ్లీకి ఉన్న క్రేజ్ చూస్తుంటే, ఇది కేవలం ఒక వంటకం కాదు, ఒక ఎమోషన్ అని అర్థమవుతుంది.

ఇడ్లీ ఎందుకు ఇంత స్పెషల్? ఎందుకంటే ఇది ఆవిరి మీద ఉడికించే ఆహారం (Steamed Food). ఇందులో నూనె వాడకం అస్సలు ఉండదు కాబట్టి కొవ్వు చాలా తక్కువ. సులభంగా జీర్ణమయ్యే గుణం ఉండటం వల్ల చిన్న పిల్లల నుంచి వృద్ధుల వరకు అందరికీ ఇది శ్రేయస్కరం. అందుకే అనారోగ్యంతో ఉన్నప్పుడు కూడా డాక్టర్లు మొదట సిఫార్సు చేసే ఆహారం ఇడ్లీయే! పులియబెట్టిన పిండితో చేయడం వల్ల ఇందులో ప్రోబయోటిక్స్ కూడా మెండుగా ఉంటాయి.

ఇడ్లీ ఒంటరిగా అస్సలు బాగుండదు.. దానికి తోడుగా వేడి వేడి సాంబార్, అల్లం చట్నీ లేదా కొబ్బరి చట్నీ ఉంటే ఆ రుచే వేరు! సాంబార్‌లోని ప్రోటీన్లు, ఇడ్లీలోని కార్బోహైడ్రేట్లు కలిస్తే అది ఒక పరిపూర్ణమైన ఆరోగ్యకరమైన భోజనం అవుతుంది. మరి ఈ 'ప్రపంచ ఇడ్లీ దినోత్సవం' నాడు మీరు కూడా ఓ నాలుగు ఇడ్లీలు లాగించేయండి.