Green Tea: బరువు తగ్గడానికి, శరీరంలోని వ్యర్థాలను బయటకు పంపడానికి చాలామంది రోజూ గ్రీన్ టీ తాగుతుంటారు. గ్రీన్ టీలో ఉండే శక్తివంతమైన యాంటీఆక్సిడెంట్లు మొత్తం ఆరోగ్యానికి మేలు చేస్తాయని తెలిసినప్పటికీ, ఇది కాలేయం ఆరోగ్యంపై ఎలాంటి ప్రభావం చూపుతుంది? దీన్ని ఎలా తీసుకోవాలి? అనే విషయాలపై ఆరోగ్య నిపుణులు పలు కీలక అంశాలను వెల్లడించారు.

లివర్‌కు గ్రీన్ టీ ఎలా మేలు చేస్తుంది?

యాంటీఆక్సిడెంట్ల శక్తి:

గ్రీన్ టీలో కాటెచిన్స్ అనే శక్తివంతమైన పాలీఫెనాల్స్ ఉంటాయి. ఇవి కాలేయంలో పేరుకుపోయే హానికరమైన ఫ్రీ రాడికల్స్‌ను తొలగించి, ఆక్సీకరణ ఒత్తిడిని తగ్గిస్తాయి.

ఫ్యాటీ లివర్ నివారణ:

క్రమం తప్పకుండా సరైన మోతాదులో గ్రీన్ టీ తీసుకోవడం వల్ల కాలేయంలో అదనపు కొవ్వు చేరకుండా నియంత్రించవచ్చని, ఇది నాన్-ఆల్కహాలిక్ ఫ్యాటీ లివర్ సమస్యను తగ్గించడంలో సహాయపడుతుందని అధ్యయనాలు సూచిస్తున్నాయి.

శోథ నిరోధక గుణాలు : కాలేయ కణాలలో వచ్చే వాపు, ఇన్ఫెక్షన్లను అదుపు చేయడంలో ఇది తోడ్పడుతుంది.

అతిగా తాగితే కాలేయానికే ముప్పు

ఏదైనా పరిమితి దాటితే ప్రమాదకరమే అన్నట్లుగా.. గ్రీన్ టీని అతిగా సేవించడం వల్ల కాలేయం దెబ్బతినే అవకాశం ఉందని వైద్యులు హెచ్చరిస్తున్నారు.

లివర్ టాక్సిసిటీ:

అధిక మోతాదులో గ్రీన్ టీ సప్లిమెంట్లు లేదా ఎక్స్‌ట్రాక్ట్‌లు తీసుకోవడం వల్ల కాలేయ ఎంజైములు పెరిగిపోయి లివర్ టాక్సిసిటీకి దారితీసే ప్రమాదం ఉంది.

ఖాళీ కడుపుతో తాగడం:

పరగడుపున గ్రీన్ టీ తాగడం వల్ల అందులోని టానిన్లు, కెఫిన్ కారణంగా ఎసిడిటీ, గ్యాస్, జీర్ణకోశ సమస్యలు తలెత్తుతాయి.

ఎలా, ఎంత మోతాదులో తీసుకోవాలి?

సరైన పరిమాణం: రోజుకు 2 నుంచి గరిష్టంగా 3 కప్పుల సాధారణ గ్రీన్ టీ మాత్రమే తాగడం సురక్షితం.

సహజమైన టీ ఎంపిక:

అధిక గాఢత కలిగిన సప్లిమెంట్లు, క్యాప్సూల్స్ కంటే సహజమైన గ్రీన్ టీ ఆకులతో లేదా టీ బ్యాగ్‌లతో తయారుచేసిన పానీయాన్ని తాగడం మంచిది.

సరైన సమయం:

భోజనం చేసిన గంట తర్వాత లేదా సాయంత్రం వేళల్లో తాగడం ఉత్తమం.

సహజసిద్ధమైన గ్రీన్ టీని తగిన మోతాదులో తీసుకుంటే కాలేయ ఆరోగ్యానికి మేలు జరుగుతుంది. అయితే ఇప్పటికే కాలేయ వ్యాధులు ఉన్నవారు గ్రీన్ టీ సప్లిమెంట్లు వాడే ముందు తప్పనిసరిగా వైద్యుల సలహా తీసుకోవడం అవసరం.

Tags: