Loss of Appetite: ఆకలి చచ్చిపోతోందా? అయితే అది మీ ప్రాణానికే ప్రమాదం కావచ్చు.. వైద్యుల హెచ్చరిక..

Loss of Appetite: సాధారణంగా వాతావరణం మారినప్పుడో లేదా బాగా అలసిపోయినప్పుడో ఆకలి కొంచెం అటు ఇటు అవ్వడం సహజమే. కానీ, ఎటువంటి కారణం లేకుండా అకస్మాత్తుగా మీకు ఆకలి వేయడం ఆగిపోయిందా? అయితే దానిని అస్సలు నిర్లక్ష్యం చేయకండి. ఎందుకంటే, ఆకలి తగ్గడం అనేది శరీరంలోని అంతర్గత అవయవాల పనితీరులో తలెత్తే తీవ్రమైన లోపాలకు సంకేతం కావొచ్చని వైద్య నిపుణులు హెచ్చరిస్తున్నారు.

ఆకలి తగ్గడం వెనుక దాగి ఉన్న వ్యాధులు

డాక్టర్ల ప్రకారం, నిరంతరం ఆకలి లేకపోవడం ఈ ఆరోగ్య సమస్యల వల్ల కావచ్చు..

జీర్ణ సమస్యలు:

గ్యాస్, ఎసిడిటీ లేదా కడుపు ఉబ్బరం వల్ల తినాలనే కోరిక తగ్గుతుంది.

థైరాయిడ్ సమస్యలు:

థైరాయిడ్ గ్రంధి పనితీరులో మార్పులు రావడం వల్ల శరీర జీవక్రియ మందగించి ఆకలి వేయదు.

రక్తహీనత : శరీరంలో ఐరన్ లోపం ఉన్నప్పుడు విపరీతమైన నీరసం వల్ల ఆకలి మందగిస్తుంది.

అవయవాల సమస్యలు:

కాలేయం లేదా మూత్రపిండాలలో తీవ్రమైన సమస్యలు ఉన్నప్పుడు ఆకలి అకస్మాత్తుగా పడిపోతుంది.

మానసిక స్థితి:

ఒత్తిడి, ఆందోళన, డిప్రెషన్ వంటివి కూడా మెదడులోని ఆకలి కేంద్రాలను అణచివేస్తాయి.

ఎప్పుడు అలర్ట్ అవ్వాలి?

ఆకలి లేకపోవడం అనేది 2 నుండి 3 వారాల కంటే ఎక్కువ కాలం కొనసాగితే అది ప్రమాదకరమే. ఈ లక్షణాలు కనిపిస్తే వెంటనే వైద్యుడిని సంప్రదించాలి..

వేగంగా బరువు తగ్గిపోవడం.

నిరంతర బలహీనత లేదా తలతిరుగుతున్నట్లు ఉండటం.

తిన్న వెంటనే వాంతులు అవ్వడం లేదా వాంతి వచ్చినట్లు అనిపించడం.

ఆకలిని పెంచుకోవడం ఎలా?

జీవనశైలిలో చిన్న చిన్న మార్పులతో ఈ సమస్యను అధిగమించవచ్చు..

నిర్ణీత సమయానికి భోజనం:

ఆకలి వేసినా వేయకపోయినా ఒక క్రమపద్ధతిలో ఆహారం తీసుకోవాలి.

ఆహార ఎంపిక: పండ్లు, కూరగాయలు మరియు ప్రోటీన్ అధికంగా ఉండే ఆహారాన్ని చేర్చుకోవాలి. జంక్ ఫుడ్ మరియు నూనె వస్తువులకు దూరంగా ఉండాలి.

శారీరక శ్రమ: క్రమం తప్పకుండా నడక, యోగా లేదా ధ్యానం చేయడం వల్ల జీర్ణక్రియ మెరుగుపడి ఒత్తిడి తగ్గుతుంది.

నీరు - నిద్ర: రోజుకు సరిపడా నీరు తాగడం, 7-8 గంటల గాఢ నిద్ర ఆకలిని నియంత్రించడంలో సహాయపడతాయి.

మీ శరీరం ఇచ్చే హెచ్చరికలను విస్మరించడం వల్ల భవిష్యత్తులో భారీ జరిమానా చెల్లించాల్సి రావచ్చు. అందుకే ఆకలిలో మార్పులను గమనిస్తూ అప్రమత్తంగా ఉండండి.