New Weapons in Cancer Treatment: క్యాన్సర్ చికిత్సలో సరికొత్త ఆయుధాలు: కీమోథెరపీ కంటే ఇమ్యునో, టార్గెటెడ్ థెరపీలు మంచివా..?

New Weapons in Cancer Treatment: క్యాన్సర్ అనగానే ఒకప్పుడు కీమోథెరపీ, రేడియేషన్ మాత్రమే గుర్తుకు వచ్చేవి. కానీ, వైద్య విజ్ఞానం పెరగడంతో ఇప్పుడు పర్సనలైజ్డ్ మెడిసిన్ అందుబాటులోకి వచ్చింది. ఇందులో భాగంగా ఇమ్యునోథెరపీ, టార్గెటెడ్ థెరపీలు క్యాన్సర్ రోగుల్లో కొత్త ఆశలు రేకెత్తిస్తున్నాయి. ఈ ఆధునిక చికిత్సల వల్ల రోగుల ఆయుష్షు పెరగడమే కాకుండా, చికిత్స ప్రక్రియ కూడా సులభతరమవుతోందని ఆరోగ్య నిపుణులు వివరిస్తున్నారు.

ఏమిటీ టార్గెటెడ్ - ఇమ్యునోథెరపీ?

టార్గెటెడ్ థెరపీ:

సాధారణ కీమోథెరపీలో క్యాన్సర్ కణాలతో పాటు ఆరోగ్యకరమైన కణాలు కూడా దెబ్బతింటాయి. కానీ టార్గెటెడ్ థెరపీ అలా కాదు. ఇది కేవలం క్యాన్సర్ కణాలలోని నిర్దిష్ట జన్యువులు లేదా ప్రోటీన్‌లను మాత్రమే గుర్తించి వాటిపై దాడి చేస్తుంది. ఆరోగ్యకరమైన కణాలకు హాని కలగదు. రొమ్ము క్యాన్సర్, పెద్దప్రేగు క్యాన్సర్ బాధితులకు ఇది ఎంతో మేలు చేస్తుంది.

ఇమ్యునోథెరపీ

ఇది నేరుగా క్యాన్సర్‌పై దాడి చేయదు. బదులుగా, రోగి శరీరంలోని రోగనిరోధక వ్యవస్థనుబలోపేతం చేస్తుంది. తద్వారా మన శరీరమే క్యాన్సర్ కణాలను గుర్తించి వాటితో పోరాడేలా చేస్తుంది. శరీరంలో దాగి ఉన్న క్యాన్సర్ కణాలను కూడా ఇది సమర్థవంతంగా ఎదుర్కొంటుంది. ఊపిరితిత్తుల క్యాన్సర్, రక్త క్యాన్సర్ రకాల్లో ఇది అద్భుత ఫలితాలను ఇస్తోంది.

రోగులందరికీ ఇవి సాధ్యమేనా?

ఈ చికిత్సలు ఎంత ప్రభావవంతమైనవో, అంతే ఖరీదైనవి కూడా. అందుకే వీటిని అందరికీ సూచించరు. చికిత్స ప్రారంభించే ముందు రోగికి అనేక రకాల జన్యు పరీక్షలు నిర్వహిస్తారు. రోగి శరీరం ఈ మందులకు స్పందిస్తుందని నిర్ధారించుకున్న తర్వాతే ఈ చికిత్సను అందిస్తారు. ఇవి క్యాన్సర్‌ను పూర్తిగా నయం చేయలేకపోయినా, వ్యాధిని దీర్ఘకాలం నియంత్రణలో ఉంచి రోగి జీవితకాలాన్ని గణనీయంగా పెంచుతాయి.

దుష్ప్రభావాలు ఉంటాయా?

ఇవి ఆధునిక చికిత్సలే అయినప్పటికీ, ఇవి పూర్తిగా సైడ్ ఎఫెక్ట్స్ లేనివి అని చెప్పలేము. రోగి పరిస్థితి, క్యాన్సర్ దశను బట్టి కొన్ని రకాల దుష్ప్రభావాలు ఉండవచ్చు. కాబట్టి నిపుణులైన ఆంకాలజిస్టుల పర్యవేక్షణలో మాత్రమే ఈ చికిత్స తీసుకోవాల్సి ఉంటుంది.