Relief from Migraine Pain: మైగ్రేన్ బాధ నుండి ఉపశమనం.. ఈ పండ్లు తింటే తలనొప్పికి చెక్

Relief from Migraine Pain: తలనొప్పి అనేది నిరంతర ఒత్తిడి, పనిభారం, నిద్ర లేమి వంటి అనేక కారణాల వల్ల వచ్చే సాధారణ సమస్య. అయితే కొందరిని బాధించే మైగ్రేన్ తలనొప్పి మాత్రం చాలా బాధాకరమైనది. జీవనశైలి సరిగా లేకపోవడం, అసమతుల్య ఆహారం, శరీరంలో నీటి కొరత, అధిక పని ఒత్తిడి మైగ్రేన్‌కు ప్రధాన కారణాలుగా చెప్పవచ్చు. ఈ తీవ్రమైన తలనొప్పి నుండి ఉపశమనం పొందడానికి కొన్ని పండ్లను ఆహారంలో చేర్చుకోవడం చాలా ప్రయోజనకరంగా ఉంటుందని నిపుణులు సూచిస్తున్నారు.

మైగ్రేన్ బాధితులు తప్పనిసరిగా తినవలసిన, ఉపశమనం అందించే అద్భుతమైన పండ్ల గురించి తెలుసుకుందాం..

పుచ్చకాయ - హైడ్రేషన్ కీలకం

మైగ్రేన్ బాధితులకు వైద్యులు తరచుగా సిఫార్సు చేసే పండ్లలో పుచ్చకాయ ముఖ్యమైనది. పుచ్చకాయలో నీరు అధికంగా ఉంటుంది. మైగ్రేన్‌కు డీహైడ్రేషన్ ఒక ప్రధాన కారణం కాబట్టి, పుచ్చకాయ తినడం వల్ల తలనొప్పి తగ్గుతుంది. కండరాలు సడలించడానికి సహాయపడుతుంది. నీటితో పాటు ఇందులో పొటాషియం, మెగ్నీషియం పుష్కలంగా ఉంటాయి. ఇవి నొప్పిని తగ్గించడంలో సహాయపడతాయి. మైగ్రేన్ బాధితులు దీన్ని క్రమం తప్పకుండా తీసుకోవడం మంచిది.

అరటిపండు పోషకాల నిధి

సాధారణ ఆరోగ్యానికి మేలు చేయడంతో పాటు, అరటిపండ్లు మైగ్రేన్లను తగ్గించడంలో కూడా సహాయపడతాయి. అరటిపండ్లలో పొటాషియం, మెగ్నీషియం అధిక మొత్తంలో ఉంటాయి. ఈ ఖనిజాలు తలనొప్పి నుండి తక్షణ ఉపశమనం పొందడానికి తోడ్పడతాయి.

ఆపిల్ యాంటీఆక్సిడెంట్ పవర్

రోజుకొక ఆపిల్ తినడం వల్ల ఆరోగ్యానికి అనేక ప్రయోజనాలు ఉన్నాయి. ఆపిల్‌లో ఉండే యాంటీఆక్సిడెంట్లు, ఫైబర్ మరియు పెక్టిన్ శరీరానికి ఎంతో మేలు చేస్తాయి. ఈ పండు మైగ్రేన్ తలనొప్పి తీవ్రతను తగ్గించడంలో సహాయపడటమే కాకుండా తలనొప్పి కారణంగా వచ్చే వికారం, వాంతులు వంటి లక్షణాలను కూడా తగ్గించడంలో తోడ్పడుతుంది.

అవకాడో విటమిన్ల గని

మైగ్రేన్ బాధితులకు అవకాడో తినడం కూడా చాలా ప్రయోజనకరం. అవకాడోలో రిబోఫ్లేవిన్, నియాసిన్, ఫోలేట్, పొటాషియంతో పాటు లుటీన్, బీటా కెరోటిన్ వంటి విటమిన్లు మంచి మొత్తంలో ఉంటాయి. ఈ పోషకాలు తలనొప్పి మరియు మైగ్రేన్ లక్షణాలను తగ్గించడంలో సహాయపడతాయి.

ఆరోగ్యకరమైన జీవనశైలి అవసరం

కేవలం ఈ పండ్లను తినడం మాత్రమే కాకుండా మైగ్రేన్ బాధితులు సమతుల్య, పోషకమైన ఆహారం తీసుకోవడం, అలాగే ఆరోగ్యకరమైన జీవనశైలిని అవలంబించడం చాలా ముఖ్యం. అదనంగా యోగా, ధ్యానం, క్రమం తప్పని వ్యాయామం వంటివి కూడా మైగ్రేన్ సమస్యను అదుపులో ఉంచడంలో దోహదపడతాయి.