Colorectal Cancer: పెద్దప్రేగు క్యాన్సర్.. లక్షణాలు లేని సైలెంట్ కిల్లర్.. ఈ 5 మార్పులను అస్సలు నిర్లక్ష్యం చేయకండి..
ఈ 5 మార్పులను అస్సలు నిర్లక్ష్యం చేయకండి..
Colorectal Cancer: ప్రపంచవ్యాప్తంగా క్యాన్సర్ మరణాలకు రెండో ప్రధాన కారణంగా నిలుస్తున్న పెద్దప్రేగు క్యాన్సర్ పట్ల ప్రజలు అప్రమత్తంగా ఉండాలని ఆరోగ్య నిపుణులు హెచ్చరిస్తున్నారు. దీనిని ప్రారంభ దశలో ఎటువంటి లక్షణాలు చూపని సైలెంట్ కిల్లర్ గా అభివర్ణిస్తారు. మంగళూరు కె.ఎం.సి ఆసుపత్రికి చెందిన గ్యాస్ట్రోఎంటరాలజిస్ట్ డాక్టర్ అనురాగ్ శెట్టి ఈ వ్యాధికి సంబంధించిన కీలక వివరాలను వెల్లడించారు.
లక్షణాలను గుర్తించడం ఎలా?
ఈ క్యాన్సర్ ప్రారంభంలో పెద్దగా ప్రభావం చూపకపోయినా, వ్యాధి ముదిరే కొద్దీ ఈ క్రింది మార్పులు కనిపిస్తాయి..
మలవిసర్జనలో మార్పులు: తరచూ విరేచనాలు లేదా మలబద్ధకం వేధించడం.
మలంలో రక్తం: మలవిసర్జన సమయంలో రక్తం పడటం లేదా మలం రంగులో మార్పు.
అకస్మాత్తుగా బరువు తగ్గడం: ఎటువంటి ప్రయత్నం చేయకుండానే బరువు తగ్గిపోవడం.
నీరసం - రక్తహీనత: శరీరంలో హిమోగ్లోబిన్ స్థాయిలు తగ్గిపోవడం వల్ల నిరంతరం అలసటగా అనిపించడం.
కడుపు నొప్పి: తరచూ కడుపులో అసౌకర్యం, నొప్పి లేదా వాంతులు అవ్వడం.
జీవనశైలి - నివారణ మార్గాలు
మన దైనందిన అలవాట్లు పెద్దప్రేగు క్యాన్సర్ ముప్పును పెంచుతాయని నిపుణులు హెచ్చరిస్తున్నారు.
ముప్పు పెంచేవి: ఊబకాయం, శారీరక శ్రమ లేకపోవడం, ప్రాసెస్ చేసిన ఆహారాలు, ఎర్ర మాంసం అధికంగా తీసుకోవడం, ధూమపానం, మద్యపానం.
ముప్పు తగ్గించేవి: నిత్యం శారీరక శ్రమ చేయడం వల్ల ఈ క్యాన్సర్ ముప్పును 19–24 శాతం వరకు తగ్గించవచ్చు. పీచు పదార్థం ఎక్కువగా ఉండే ఆహారం, తగినంత నీరు తీసుకోవడం ద్వారా పేగు ఆరోగ్యాన్ని కాపాడుకోవచ్చు.
నిర్ధారణ - స్క్రీనింగ్
క్యాన్సర్గా మారకముందే పేగుల్లో ఏర్పడే పాలిప్స్ ను గుర్తించడం ద్వారా ఈ వ్యాధిని నివారించవచ్చు.
పరీక్షలు: 45 ఏళ్లు దాటిన వారు లేదా కుటుంబంలో క్యాన్సర్ చరిత్ర ఉన్నవారు క్రమం తప్పకుండా కోలోనోస్కోపీ వంటి పరీక్షలు చేయించుకోవాలి.
ఎండోస్కోపీ: ఒకవేళ పాలిప్స్ గుర్తిస్తే, వాటిని ఎండోస్కోపీ ద్వారా తొలగించి క్యాన్సర్ రాకుండా అడ్డుకోవచ్చు.
ప్రారంభ దశలో గుర్తిస్తే.. 92శాతం నయం
పెద్దప్రేగు క్యాన్సర్ను ఎంత త్వరగా గుర్తిస్తే అంత మేలు.
వ్యాధిని మొదటి దశలోనే గుర్తిస్తే, రోగి కోలుకునే అవకాశం 92 శాతం వరకు ఉంటుంది.
ఒకవేళ నిర్లక్ష్యం చేసి వ్యాధి ఇతర అవయవాలకు పాకితే ప్రాణాపాయం పెరిగి కోలుకునే అవకాశం 16 శాతానికి పడిపోతుంది.