చలికాలంలో వేధిస్తున్న కీళ్ల నొప్పులు: కారణాలేంటి?

చలికాలం వచ్చిందంటే చాలు.. వయసుతో సంబంధం లేకుండా చాలామందిని వేధించే ప్రధాన సమస్య కీళ్ల నొప్పులు. ఉదయం నిద్రలేవగానే కాళ్లు, చేతులు బిగుసుకుపోయినట్లు ఉండటం, నడుస్తున్నప్పుడు కీళ్లలో నొప్పి రావడం వంటివి ఈ సీజన్‌లో సర్వసాధారణం. అయితే కొన్ని చిన్నపాటి జాగ్రత్తలు, ఆహారపు అలవాట్లతో ఈ సమస్య నుండి సులభంగా బయటపడవచ్చని ఆరోగ్య నిపుణులు సూచిస్తున్నారు.

నొప్పులకు ప్రధాన కారణాలు ఇవే!

నీరు తక్కువగా తాగడం: చలికాలంలో దాహం తక్కువగా వేయడం వల్ల చాలామంది నీరు తాగడం తగ్గిస్తారు. దీనివల్ల కీళ్లలోని సైనోవియల్ ద్రవం ఎండిపోయి, ఎముకల మధ్య ఘర్షణ పెరుగుతుంది. ఫలితంగా నొప్పులు, దృఢత్వం ఏర్పడతాయి.

విటమిన్-డి లోపం: ఎండ తక్కువగా ఉండటం వల్ల శరీరంలో విటమిన్-డి స్థాయిలు తగ్గుతాయి. ఇది ఎముకల బలహీనతకు, కండరాల నొప్పులకు దారితీస్తుంది.

బరువు పెరగడం: చలి నుండి ఉపశమనం కోసం ఈ సీజన్‌లో ఎక్కువగా ఆహారం తీసుకోవడం వల్ల బరువు పెరుగుతారు. పెరిగిన బరువు కీళ్లపై అదనపు ఒత్తిడిని కలిగిస్తుంది.

ఉపశమనం కోసం చిట్కాలు:

గోరువెచ్చని నీరు: రోజంతా తగినంత గోరువెచ్చని నీటిని తాగడం వల్ల కండరాలు రిలాక్స్ అవుతాయి. కీళ్లలో తేమ అందుతుంది.

పౌష్టికాహారం: నువ్వులు, బాదం, వాల్‌నట్స్, వేరుశెనగలు, పచ్చి కూరగాయలు,పప్పు ధాన్యాలను ఆహారంలో చేర్చుకోవాలి. పసుపు పాలు తాగడం వల్ల శరీరంలో మంట తగ్గుతుంది.

నూనె మసాజ్: ఆవాలు, కొబ్బరి లేదా నువ్వుల నూనెతో కీళ్లపై 10 నిమిషాల పాటు సున్నితంగా మసాజ్ చేయడం వల్ల రక్త ప్రసరణ మెరుగుపడి దృఢత్వం తగ్గుతుంది.

వేడి కాపడం: నొప్పి ఉన్న చోట హాట్ వాటర్ బ్యాగ్ లేదా వేడి గుడ్డతో కాపడం పెట్టడం వల్ల తక్షణ ఉపశమనం లభిస్తుంది.

ఎండలో ఉండటం: విటమిన్-డి సహజంగా అందాలంటే రోజుకు కనీసం 30 నిమిషాల పాటు లేత ఎండలో నడవడం లేదా కూర్చోవడం అలవాటు చేసుకోవాలి.

తీసుకోవాల్సిన జాగ్రత్తలు:

బయటకు వెళ్లేటప్పుడు శరీరం మొత్తం కప్పేలా మందపాటి దుస్తులు ధరించాలి. ముఖ్యంగా మోకాళ్లు, చేతులు చలికి గురికాకుండా చూసుకోవాలి. నొప్పులు మరీ ఎక్కువగా ఉంటే నిర్లక్ష్యం చేయకుండా వైద్యుడిని సంప్రదించడం ఉత్తమం.

ఆరోగ్యకరమైన జీవనశైలి, సరైన ఆహారం మరియు శరీరానికి తగినంత వెచ్చదనాన్ని అందించడం ద్వారా ఈ చలికాలంలో కీళ్ల నొప్పులకు చెక్ పెట్టవచ్చు.