Want to Reduce Cancer Risk: క్యాన్సర్ ముప్పు నుంచి తప్పించుకోవాలా..? ఈ 4 జీవనశైలి మార్పులు తప్పనిసరి..
ఈ 4 జీవనశైలి మార్పులు తప్పనిసరి..
Want to Reduce Cancer Risk: ప్రస్తుతం ప్రపంచవ్యాప్తంగా, ముఖ్యంగా భారతదేశంలో క్యాన్సర్ కేసుల పెరుగుదల తీవ్ర ఆందోళన కలిగిస్తోంది. ఇది ప్రాణాంతక వ్యాధి అయినప్పటికీ, అప్రమత్తత, సరైన జీవనశైలితో దీనిని నివారించవచ్చని వైద్య నిపుణులు స్పష్టం చేస్తున్నారు. ప్రముఖ వైద్యులు డాక్టర్ రోహిత్ కపూర్ అభిప్రాయం ప్రకారం.. జన్యుపరమైన కారణాల కంటే మన రోజువారీ అలవాట్లు, ఆహారపు అలవాట్లే మెజారిటీ క్యాన్సర్ కేసులకు ప్రధాన కారణమవుతున్నాయి. క్యాన్సర్ ముప్పును తగ్గించుకోవడానికి నిపుణులు సూచిస్తున్న కీలక జాగ్రత్తలు ఇవే..
ఆహారమే ఔషధం
క్యాన్సర్ను ఎదుర్కోవడంలో పోషకాహారం కీలక పాత్ర పోషిస్తుంది.
ఏమి తినాలి? ఆకుకూరలు, తాజా పండ్లు క్రమం తప్పకుండా తీసుకోవాలి. ముఖ్యంగా నారింజ, మామిడి వంటి సిట్రస్ పండ్లు, డ్రై ఫ్రూట్స్ తీసుకోవడం వల్ల శరీరానికి కావాల్సిన యాంటీ ఆక్సిడెంట్స్ లభిస్తాయి. ఇవి కణజాలాన్ని దెబ్బతీసే ఫ్రీ రాడికల్స్ నుండి రక్షణ కల్పిస్తాయి.
ఏమి మానుకోవాలి?: అతిగా మసాలాలు ఉన్న ఆహారం, జంక్ ఫుడ్, నిల్వ ఉంచిన ప్రాసెస్డ్ ఫుడ్స్కు దూరంగా ఉండటం మేలు.
వ్యసనాలకు స్వస్తి పలకండి
క్యాన్సర్ బారిన పడటానికి పొగాకు, మద్యం అతిపెద్ద కారకాలు.
ధూమపానం - పొగాకు: సిగరెట్లు, బీడీలు లేదా నమిలే పొగాకు వల్ల నోరు, గొంతు, ఊపిరితిత్తుల క్యాన్సర్ వచ్చే అవకాశం 90శాతం ఎక్కువగా ఉంటుంది.
మద్యం: అతిగా మద్యం సేవించడం కాలేయ సంబంధిత క్యాన్సర్లకు దారితీస్తుంది. ఆరోగ్యకరమైన భవిష్యత్తు కోసం ఈ అలవాట్లను పూర్తిగా వదిలేయడం అత్యవసరం.
బరువు నియంత్రణ - వ్యాయామం
అధిక బరువు లేదా స్థూలకాయం అనేక రకాల క్యాన్సర్లకు పరోక్షంగా కారణమవుతోంది. రోజుకు కనీసం 15 నుండి 20 నిమిషాల పాటు నడక, యోగా లేదా ఏదైనా శారీరక వ్యాయామం చేయడం ద్వారా బరువును అదుపులో ఉంచుకోవచ్చు. ఇది శరీర రోగనిరోధక శక్తిని కూడా పెంచుతుంది.
కుటుంబ చరిత్ర మరియు ముందస్తు పరీక్షలు
మీ కుటుంబంలో ఎవరికైనా క్యాన్సర్ ఉన్నట్లయితే, మీరు మరింత అప్రమత్తంగా ఉండాలి. జన్యుపరంగా వచ్చే క్యాన్సర్లను గుర్తించడానికి 20 ఏళ్ల వయస్సు దాటినప్పటి నుండి క్రమం తప్పకుండా డాక్టర్ల సలహాతో క్యాన్సర్ స్క్రీనింగ్ పరీక్షలు చేయించుకోవాలి. వ్యాధిని ముందే గుర్తిస్తే చికిత్స సులభతరం అవుతుంది.