Newborn Babies Be Given a Bath: పసి పిల్లలకు స్నానం ఎప్పుడు చేయించాలి.. జాగ్రత్తలు ఇవే!

Newborn Babies Be Given a Bath: పూర్వం బిడ్డ పుట్టిన వెంటనే స్నానం చేయించే ఆచారం ఉండేది. అయితే మారుతున్న కాలంతో పాటు వైద్య శాస్త్రంలో వచ్చిన మార్పుల ప్రకారం, శిశువుకు పుట్టిన వెంటనే స్నానం చేయించడం అంత మంచిది కాదని నిపుణులు హెచ్చరిస్తున్నారు. శిశువు జన్మించిన 24 నుండి 48 గంటల తర్వాతే మొదటిసారి స్నానం చేయించడం ఉత్తమమని తాజా అధ్యయనాలు వెల్లడిస్తున్నాయి. ముఖ్యంగా బిడ్డకు ఉన్న బొడ్డు తాడు పూర్తిగా ఎండిపోయి ఊడిపోయే వరకు నీటితో స్నానం చేయించకుండా, కేవలం 'స్పాంజ్ బాత్' (తడి గుడ్డతో తుడవడం) చేయడమే సురక్షితమని వైద్యులు సూచిస్తున్నారు.

శిశువును శుభ్రపరిచే సమయంలో అత్యంత సున్నితంగా వ్యవహరించడం చాలా ముఖ్యం. బిడ్డ తలని క్లీన్ చేయడానికి కరుకుగా ఉండే వస్త్రాలను కాకుండా, చాలా మెత్తటి క్లాత్‌ను మాత్రమే వాడాలి. స్నానానికి ఉపయోగించే నీరు మరీ వేడిగా లేదా మరీ చల్లగా ఉండకూడదు; కేవలం గోరువెచ్చని నీటిని మాత్రమే ఉపయోగించాలి. స్నానం చేయించే సమయంలో శిశువు చర్మాన్ని గట్టిగా రుద్దడం వంటివి చేయకూడదని, నెలలు గడిచే కొద్దీ క్రమంగా అలవాటు చేయాలని నిపుణులు పేర్కొంటున్నారు.

అంతేకాకుండా, పాతకాలపు పద్ధతులైన ముక్కు పొడవుగా వస్తుందని లాగడం లేదా గట్టిగా మసాజ్ చేయడం వంటి పనులు అస్సలు చేయకూడదు. ఇలా చేయడం వల్ల పసి పిల్లల సున్నితమైన అవయవాలకు గాయాలయ్యే ప్రమాదం ఉంది. స్నానం చేయించే సమయంలో బిడ్డ తల, మెడ కింద తప్పనిసరిగా చేతి సపోర్ట్ ఉంచాలని, కొత్తగా తల్లిదండ్రులైన వారు వీలైతే అనుభవజ్ఞులైన వేరొకరి సహాయం తీసుకోవడం మంచిదని ఆరోగ్య నిపుణులు సలహా ఇస్తున్నారు.