From Constipation Relief to Glowing Skin: మలబద్ధకం నుండి మెరిసే చర్మం వరకు.. నెయ్యితో ఎన్ని ఉపయోగాలో తెలుసా?

From Constipation Relief to Glowing Skin: భారతీయ వంటశాలల్లో నెయ్యి లేనిదే భోజనం పూర్తి కాదు. ముఖ్యంగా రాజస్థాన్, హర్యానా వంటి రాష్ట్రాల్లో దీనిని అమృతంగా భావిస్తారు. కేవలం అన్నంలో వేసుకోవడానికే కాకుండా నెయ్యిని సరైన పద్ధతిలో ఉపయోగిస్తే ఎన్నో అనారోగ్య సమస్యలకు ఇంటి వద్దే చెక్ పెట్టవచ్చని ఆయుర్వేద నిపుణులు చెబుతున్నారు. దేశీ నెయ్యిలో ఉండే విటమిన్ ఎ, డి, ఇ, కె, ఒమేగా-3 ఫ్యాటీ యాసిడ్లు మన శరీరానికి చేసే మేలు అంతా ఇంతా కాదు.

నెయ్యితో మనం పొందగలిగే 5 అద్భుతమైన ప్రయోజనాలు ఇప్పుడు చూద్దాం..

మృదువైన పెదాల కోసం..

చలికాలంలో లేదా వేసవిలో పెదాలు పగిలి ఇబ్బంది పెడుతుంటే, రసాయనాలతో కూడిన లిప్ బామ్స్ కంటే దేశీ నెయ్యి అద్భుతంగా పనిచేస్తుంది. రోజూ రాత్రి పడుకునే ముందు పెదాలకు కొద్దిగా నెయ్యి రాయడం వల్ల అవి మృదువుగా మారుతాయి. అంతేకాదు బొడ్డుకు నెయ్యి రాయడం వల్ల కూడా చర్మం కాంతివంతంగా తయారవుతుందని మన పెద్దలు చెబుతుంటారు.

మలబద్ధకం నుండి ఉపశమనం

జీర్ణక్రియ సరిగ్గా లేక మలబద్ధకంతో బాధపడేవారికి నెయ్యి ఒక మంచి ఔషధం. ప్రతిరోజూ ఉదయం పరగడుపున గ్లాసు గోరువెచ్చని నీటిలో ఒక స్పూన్ నెయ్యి కలుపుకుని తాగితే.. ప్రేగుల పనితీరు మెరుగుపడి మలవిసర్జన సులభంగా జరుగుతుంది.

మెరిసే చర్మం మీ సొంతం

నెయ్యి ఒక సహజమైన మాయిశ్చరైజర్‌గా పనిచేస్తుంది. ఇందులో ఉండే యాంటీ ఆక్సిడెంట్లు చర్మంపై ముడతలను తగ్గించి, సహజమైన మెరుపును అందిస్తాయి. ఆయుర్వేదంలో దీనిని షట్ధౌత్ ధృతి రూపంలో చర్మ సంరక్షణకు ఉపయోగిస్తారు.

గొంతు నొప్పికి చెక్

వాతావరణ మార్పుల వల్ల వచ్చే గొంతు నొప్పి లేదా దగ్గుకు నెయ్యి మంచి ఉపశమనాన్ని ఇస్తుంది. ఒక చెంచా నెయ్యిలో చిటికెడు నల్ల మిరియాల పొడి కలిపి తీసుకుంటే, గొంతులో ఉన్న చికాకు తగ్గుతుంది. నెయ్యి గొంతును తేమగా ఉంచితే, మిరియాలు ఇన్ఫెక్షన్లను అరికడతాయి.

కీళ్ల నొప్పుల నివారణ

నెయ్యి తీసుకోవడం వల్ల ఎముకలు బలపడతాయి. ఒకవేళ కీళ్ల నొప్పులు లేదా చిన్నపాటి వాపులు ఉంటే, నెయ్యిలో కొద్దిగా పసుపు వేసి వేడి చేసి ఆ పేస్ట్‌ను నొప్పి ఉన్న చోట పూయాలి. ఇలా చేయడం వల్ల వాపు తగ్గి త్వరగా ఉపశమనం కలుగుతుంది.

"అతి సర్వత్ర వర్జయేత్" అన్నట్లుగా.. నెయ్యిలో ఎన్ని పోషకాలు ఉన్నా, దానిని తగిన పరిమాణంలో తీసుకోవడం ముఖ్యం. ముఖ్యంగా మీరు వాడే నెయ్యి స్వచ్ఛమైన దేశీ నెయ్యి అని నిర్ధారించుకోండి. రోజూ కొద్దిగా నెయ్యిని మీ ఆహారంలో భాగం చేసుకోండి.. ఆరోగ్యాన్ని కాపాడుకోండి.