Eat Bay Leaves: బిర్యానీ ఆకు తినడం సురక్షితమేనా? ఆరోగ్య నిపుణులు హెచ్చరిస్తున్న నిజాలివే..

Eat Bay Leaves: మనం చేసుకునే బిర్యానీ, పులావ్, మసాలా కూరలు, చారుల్లో మంచి సువాసన, రుచి కోసం బిర్యానీ ఆకును విస్తృతంగా ఉపయోగిస్తాం. ఆహారం తయారయ్యాక దాదాపు అందరూ ఆకును పక్కన పడేస్తారు. అయితే కొందరు మాత్రం దాన్ని నమిలి మింగేస్తుంటారు. అసలు బిర్యానీ ఆకును నేరుగా తినడం సురక్షితమేనా? వైద్యులు, పౌష్టికాహార నిపుణులు ఏమంటున్నారో తెలుసుకుందాం.

బిర్యానీ ఆకును నేరుగా ఎందుకు తినకూడదు?

బిర్యానీ ఆకు ఆరోగ్యానికి విషపూరితమైనది కాదు. కానీ, దాన్ని నేరుగా నమిలి తినడం వల్ల కొన్ని ఆరోగ్య సమస్యలు వచ్చే ప్రమాదం ఉంది..

జీర్ణక్రియకు కష్టం:

బిర్యానీ ఆకులో ఉండే పీచు పదార్థం చాలా గట్టిగా ఉంటుంది. మన శరీరంలోని జీర్ణ ఎంజైమ్‌లు దీనిని అంత సులభంగా అరిగించలేవు.

గొంతు, అన్నవాహికకు గాయాలు:

ఎండిన బిర్యానీ ఆకు అంచులు చాలా పదునుగా ఉంటాయి. దాన్ని సరిగ్గా నమలకుండా మింగితే గొంతులో సరిపడక పోవడం, అన్నవాహికకు గీతలు పడటం లేదా కడుపు లోపల గుచ్చుకునే ప్రమాదం ఉంది.

శ్వాస సంబంధిత ఇబ్బందులు:

సరిగ్గా నమలని పెద్ద ముక్కలు గొంతులో అడ్డుపడి శ్వాస తీసుకోవడంలో ఇబ్బంది కలిగిస్తాయి.

వంటల్లో వాడటం వల్ల కలిగే ప్రయోజనాలు

బిర్యానీ ఆకు నేరుగా తినడం మంచిది కాకపోయినా, వంటల్లో మరిగించడం వల్ల దానిలోని ఎసెన్షియల్ ఆయిల్స్ ఆహారంలోకి చేరి మంచి ప్రయోజనాలను అందిస్తాయి..

జీర్ణశక్తి పెరుగుతుంది:

జీర్ణ రసాల ఉత్పత్తిని ప్రేరేపించి గ్యాస్, కడుపు ఉబ్బరం వంటి సమస్యలను తగ్గిస్తుంది.

యాంటీఆక్సిడెంట్లు:

ఇందులో ఉండే ఫ్లేవనాయిడ్లు, పాలిఫినాల్స్ వంటి యాంటీఆక్సిడెంట్లు శరీరాన్ని ఆక్సిడేటివ్ ఒత్తిడి నుండి కాపాడతాయి.

చక్కెర స్థాయిల నియంత్రణ:

కొన్ని ప్రాథమిక అధ్యయనాల ప్రకారం ఇది రక్తంలో చక్కెర స్థాయిలను నియంత్రించడంలో సహాయపడుతుంది.

వాపులను తగ్గిస్తుంది: శరీరంలో కలిగే వాపులు తగ్గించడానికి దోహదపడుతుంది.

బిర్యానీ ఆకును వాడటానికి సరైన పద్ధతి

మసాలాగా మరిగించడం:

వంట చేసేటప్పుడు ఆకును వేసి, వంట పూర్తయిన తర్వాత ఆకును బయటకు తీసి పక్కన పెట్టేయాలి.

పౌడర్ రూపంలో:

బిర్యానీ ఆకు ప్రయోజనాలు పూర్తిగా పొందాలంటే దాన్ని బాగా ఎండబెట్టి, మెత్తటి పొడిగా చేసి గరం మసాలా, సూప్‌లు లేదా కూరల్లో వాడుకోవచ్చు.

కషాయం లేదా టీ:

కాచి వడకట్టిన కషాయం రూపంలో కూడా తీసుకోవచ్చు