Night Care Tips for Shiny and Healthy Hair: మెరిసే కురుల కోసం.. రాత్రి వేళ చిట్కాలు!

Night Care Tips for Shiny and Healthy Hair: మారుతున్న జీవనశైలి, కాలుష్యం కారణంగా చాలామంది ఎదుర్కొనే ప్రధాన సమస్య.. జుట్టు పొడిబారిపోవడం. ఒక్కోసారి జుట్టు ఎంతలా నిర్జీవంగా మారుతుందంటే, చూడటానికి గడ్డిలా కనిపిస్తుంది. రసాయనాలు ఉన్న షాంపూలు కాకుండా, ఇంట్లోనే దొరికే సహజసిద్ధమైన వస్తువులతో రాత్రి పూట కొన్ని జాగ్రత్తలు తీసుకుంటే.. మీ జుట్టును మళ్ళీ పట్టులా మెరిపించుకోవచ్చు.

ముందుగా జుట్టుకు ప్రాణం పోసే గుమ్మడికాయ హెయిర్ మాస్క్ గురించి తెలుసుకుందాం.తేమ కోల్పోయిన జుట్టుకు గుమ్మడికాయ ఒక అద్భుతమైన సంజీవనిలా పనిచేస్తుంది.ఇందుకోసం కొన్ని ఎర్ర గుమ్మడి కాయ ముక్కలను తీసుకోండి.అందులో రెండు టీస్పూన్ల తేనె కలిపి మెత్తటి పేస్ట్‌లా చేయండి.ఈ మిశ్రమాన్ని కుదుళ్ల నుంచి జుట్టు చివర్ల వరకు బాగా పట్టించాలి.రాత్రి పడుకునే ముందు ఈ మాస్క్ వేసుకుని, షవర్ క్యాప్ పెట్టుకోండి. మరుసటి రోజు ఉదయాన్నే గాఢత తక్కువగా ఉండే షాంపూతో తలస్నానం చేస్తే.. మీ జుట్టు ఎంత మృదువుగా మారుతుందో మీరే గమనిస్తారు.

ఇక రెండో చిట్కా.. నూనెతో మర్దన! జుట్టు ఆరోగ్యంగా పెరగాలంటే కుదుళ్లు దృఢంగా ఉండటం చాలా ముఖ్యం. దీని కోసం ఒక ప్రత్యేకమైన మిశ్రమాన్ని తయారుచేసుకుందాం.రెండు టీస్పూన్ల ఆలివ్ నూనె తీసుకోండి.అందులో రెండు గుడ్లలోని పచ్చసొనలు, కొద్దిగా కలబంద గుజ్జు కలపండి.ఈ మిశ్రమాన్ని కుదుళ్లకు పట్టించి కనీసం 15 నిమిషాల పాటు సున్నితంగా మర్దన చేయండి.ఇలా చేయడం వల్ల రక్త ప్రసరణ మెరుగుపడి జుట్టు వేగంగా పెరుగుతుంది. రాత్రి పూట జుట్టును పైకి ముడేసి షవర్ క్యాప్ ధరించి, ఉదయాన్నే మైల్డ్ షాంపూతో స్నానం చేయండి.ఈ చిట్కాలను క్రమం తప్పకుండా పాటించడం వల్ల జుట్టుకు కావాల్సిన పోషణ అందడమే కాకుండా, చిట్లిపోవడం వంటి సమస్యలు కూడా తగ్గుతాయి. మార్కెట్లో దొరికే ఖరీదైన ఉత్పత్తుల కంటే, మన వంటింట్లో దొరికే ఈ సహజ పదార్థాలే జుట్టుకు నిజమైన బలాన్నిస్తాయి.