Protect Your Hair from Pollution Damage: కాలుష్యం వల్ల జుట్టు పాడుకాకుండా ఉండాలంటే..ఈ తప్పులు అస్సలు చేయకండి!

Protect Your Hair from Pollution Damage:  ఈ రోజుల్లో చాలామందిని వేధిస్తున్న అతిపెద్ద సమస్య... జుట్టు రాలిపోవడం! రోజురోజుకీ పెరిగిపోతున్న కాలుష్యం, మారుతున్న జీవన విధానం, మానసిక ఒత్తిడి... మన కురుల ఆరోగ్యంపై తీవ్ర ప్రభావం చూపిస్తున్నాయి. దీనివల్ల జుట్టు విపరీతంగా ఊడిపోవడం, పలుచగా అయిపోవడం, చిన్న వయసులోనే తెల్లబడటం వంటి సమస్యలు ఎదురవుతున్నాయి. మరి ఈ సమస్యల నుంచి ఉపశమనం పొంది, చక్కటి కేశసంపదను ఎలా సొంతం చేసుకోవాలో తెలుసుకుందాం.

జుట్టు ఆరోగ్యంగా ఉండాలంటే మొదటగా మనం తీసుకునే ఆహారంపై దృష్టి పెట్టాలి. కేవలం పై పైన నూనెలు, షాంపూలు మార్చితే సరిపోదు... లోపలి నుంచి జుట్టుకు పోషణ అందాలి. అందుకోసం మీ రోజువారి ఆహారంలో ప్రోటీన్లు, ఐరన్, విటమిన్-ఇ ఎక్కువగా ఉండేలా చూసుకోండి. గుడ్లు, ఆకుకూరలు, మొలకెత్తిన గింజలు, బాదం, సీజనల్ పండ్లను క్రమం తప్పకుండా తీసుకోవడం వల్ల జుట్టు లోపలి నుండి బలంగా తయారవుతుంది.

ఇక రెండోది... రసాయనాలకు దూరంగా ఉండటం. మార్కెట్లో దొరికే రకరకాల కెమికల్ షాంపూలు, కలర్స్, హెయిర్ స్ట్రైటెనర్స్ జుట్టును మరింత బలహీనపరుస్తాయి. వీలైనంత వరకు కుంకుడుకాయలు, శీకాకాయ లేదా మైల్డ్ ఆయుర్వేదిక్ షాంపూలను వాడటానికి ప్రయత్నించండి. అలాగే వారానికి కనీసం రెండు సార్లు గోరువెచ్చని కొబ్బరి నూనె లేదా ఆముదంతో తలకు బాగా మసాజ్ చేయండి. ఇది రక్తప్రసరణను పెంచి, జుట్టు కుదుళ్లను దృఢంగా చేస్తుంది.

వీటితో పాటు, బయటకు వెళ్లేటప్పుడు కాలుష్యం, దుమ్ము, ధూళి నుండి జుట్టును రక్షించుకోవడానికి స్కార్ఫ్ లేదా క్యాప్ ధరించడం మర్చిపోకండి. తలస్నానం చేసిన తర్వాత జుట్టును గట్టిగా తుడవడం, తడి జుట్టుతోనే దువ్వడం అస్సలు చేయకూడదు. ఎందుకంటే తడిగా ఉన్నప్పుడు జుట్టు చాలా సున్నితంగా ఉండి, త్వరగా ఊడిపోయే ప్రమాదం ఉంది.రోజుకు కనీసం 8 నుండి 10 గ్లాసుల నీళ్లు తాగితే ఒత్తిడిని తగ్గించుకుని కంటినిండా నిద్రపోతే బెటర్. ఈ చిన్న చిన్న జాగ్రత్తలు పాటిస్తే, కాలుష్యం ఎంత ఉన్నా మీ జుట్టును మీరు కాపాడుకోవచ్చు.