Airbus A320 Software Glitch Sparks Chaos: ఎయిర్‌బస్ సాఫ్ట్‌వేర్ సమస్యతో విమానాలు ఆలస్యం: ఎయిర్ ఇండియా, ఇండిగో సర్వీసులపై ప్రభావం..

Airbus A320 Software Glitch Sparks Chaos: ఎయిర్‌బస్ విమానాల్లో సాంకేతిక లోపం తలెత్తడంతో ప్రపంచవ్యాప్తంగా విమాన రాకపోకలు గందరగోళానికి గురయ్యాయి. భారత్‌లోని ప్రముఖ విమానయాన సంస్థలైన ఎయిర్‌ఇండియా, ఇండిగో విమానాల సర్వీసులపై తీవ్ర ప్రభావం పడింది. యూరోపియన్ యూనియన్ ఏవియేషన్ సేఫ్టీ ఏజెన్సీ (ఈఏఎస్‌ఏ) ప్రకటన ప్రకారం, ఎయిర్‌బస్ ఎ320 మోడల్ విమానాల్లో సౌర రేడియేషన్ కారణంగా కీలక డేటా దెబ్బతిని, సాఫ్ట్‌వేర్ మార్పులు చేయాల్సిన పరిస్థితి ఏర్పడింది. దీంతో ప్రపంచవ్యాప్తంగా 6 వేల ఎయిర్‌బస్ విమానాలకు అప్‌గ్రేడ్ అవసరమైంది.

ఎయిర్‌బస్ విమానాల్లో తలెత్తిన సాంకేతిక సమస్య ప్రపంచవ్యాప్త విమాన రాకపోకలకు తీవ్ర అంతరాయం కలిగించింది. ఈఏఎస్‌ఏ ప్రకటనలో ఎయిర్‌బస్ హెచ్చరికలు వివరించగా, ఎ320 మోడల్ విమానాల్లో సౌర రేడియేషన్ ప్రభావంతో నియంత్రణ వ్యవస్థల్లోని కీలక డేటా దెబ్బతిన్నట్లు తెలిపింది. దీని కారణంగా సాఫ్ట్‌వేర్‌లో తప్పులు తలెత్తి, విమానాల భద్రతకు సంబంధించిన సమస్యలు ఏర్పడ్డాయి. ప్రపంచవ్యాప్తంగా 6 వేల ఎయిర్‌బస్ విమానాలకు ఈ అప్‌గ్రేడ్ చేయాల్సి ఉందని ఎయిర్‌బస్ వెల్లడించింది. ఈ పరిణామాలతో ఎ320 విమానాల సర్వీసులు మీద తీవ్ర ప్రభావం పడింది.

ఈ సమస్య ప్రభావితమైన విమానయాన సంస్థల్లో ఎయిర్‌ఫ్రాన్స్ ముందంజలో ఉంది. తమ సంస్థకు చెందిన 35 ఎయిర్‌బస్ విమాన సర్వీసులను రద్దు చేసిన ఎయిర్‌ఫ్రాన్స్, మరికొన్ని విమానాలపై కూడా ప్రభావం పడవచ్చని హెచ్చరించింది. కొలంబియా ఎయిర్‌లైన్ ఏవియాంకా సంస్థలో 70 శాతం సర్వీసులు ప్రభావితమైనట్లు తెలిపింది. భారత్‌లో ఎ320 మోడల్ విమానాలు 560 వరకు ఉన్నాయి. ఇందులో 200-250 విమానాల్లో సాఫ్ట్‌వేర్, హార్డ్‌వేర్ మార్పులు చేయాల్సి ఉంది. దీంతో భారతీయ విమానయాన సంస్థల సర్వీసులపై గందరగోళం తప్పలేదు.

ఈ సమస్య నేపథ్యంలో ఇండిగో విమానయాన సంస్థ ముందస్తు చర్యలు చేపట్టింది. తమ సర్వీసుల షెడ్యూల్‌లో మార్పులు జరగవచ్చని ప్రకటించిన ఇండిగో, మార్గదర్శకాలకు అనుగుణంగా పని చేస్తున్నట్లు తెలిపింది. ఎయిర్‌ఇండియా, ఎయిర్‌ఇండియా ఎక్స్‌ప్రెస్ కూడా ఇలాంటి ప్రకటనలు చేశాయి. పలు మార్గాల్లో విమానాల ఆలస్యం, రద్దులు జరగవచ్చని హెచ్చరించాయి. అయితే, ఎన్ని సర్వీసులు ప్రభావితమవుతాయనే వివరాలు ఆయా సంస్థలు పేర్కొనలేదు. ఈ సమస్యకు త్వరలో పరిష్కారం కనుక్కోవడానికి ఎయిర్‌బస్, విమానయాన సంస్థలు కృషి చేస్తున్నాయి.