Amit Shah Announces High-Level Committee: అమిత్ షా ప్రకటన: అక్రమ వలసలు, జనాభా మార్పులపై ఉన్నత స్థాయి కమిటీ

దేశ సార్వభౌమత్వం, భద్రతకు సవాలు

Amit Shah Announces High-Level Committee: అక్రమ వలసలు మరియు ఇతర కారణాల వల్ల దేశంలో అసహజ జనాభా మార్పులు (డెమోగ్రాఫిక్ షిఫ్ట్స్) చోటు చేసుకుంటున్న నేపథ్యంలో కేంద్ర ప్రభుత్వం కీలక చర్య తీసుకుంది. ఈ సమస్యను సమగ్రంగా అధ్యయనం చేసి, నివారణ చర్యలు సూచించడానికి ఉన్నత స్థాయి కమిటీని ఏర్పాటు చేసినట్లు కేంద్ర హోం మంత్రి అమిత్ షా ప్రకటించారు.

గతంలో ప్రధాని నరేంద్ర మోదీ సూచన మేరకు రిటైర్డ్ జడ్జి నేతృత్వంలో ఈ కమిటీని ఏర్పాటు చేశామని అమిత్ షా తెలిపారు. జనాభా మార్పులు భారతదేశ సార్వభౌమత్వం, జాతీయ భద్రత, సామాజిక సమతుల్యం మరియు ఆదివాసీ సమాజాల పరిరక్షణకు తీవ్ర సవాలుగా మారాయని ఆయన ఆందోళన వ్యక్తం చేశారు.

కమిటీ వివరాలు:

అధ్యక్షులు: రిటైర్డ్ జస్టిస్ ప్రకాష్ ప్రభాకర్ నావోలేకర్

సభ్యులు:

మాజీ ఐఏఎస్ అధికారి దుర్గా శంకర్ మిశ్రా

మాజీ ఐపీఎస్ అధికారి బాలాజీ శ్రీవాస్తవ

ఆర్థికవేత్త డా. షమికా రవి

ఈ కమిటీ దేశవ్యాప్తంగా జరుగుతున్న జనాభా మార్పులపై సమగ్ర మూల్యాంకనం చేసి, మతపరం, సామాజిక వర్గాల వారీగా జనాభా సరళిని విశ్లేషించనుంది.

అమిత్ షా మాట్లాడుతూ, చొరబాటుదారులను అడ్డుకోవడంలో రాష్ట్ర ప్రభుత్వాలు కేంద్రానికి పూర్తి సహకరించాలని పిలుపునిచ్చారు. ఈ కమిటీ నివేదిక ఆధారంగా కేంద్రం తగిన చట్టపరమైన మరియు అడ్మినిస్ట్రేటివ్ చర్యలు తీసుకోనుందని సూచనలు వస్తున్నాయి.