Supreme Court Issues Key Directions: హైకోర్టులు రిజర్వ్ చేసిన తీర్పులను 3 నెలల్లోపు వెలువరించాలి: సుప్రీం కోర్టు కీలక ఆదేశాలు

Supreme Court Issues Key Directions: రాష్ట్ర హైకోర్టులు తీర్పు రిజర్వ్ చేసిన తర్వాత గరిష్టంగా మూడు నెలల్లోపు ఆ తీర్పును ప్రకటించాలని సుప్రీం కోర్టు స్పష్టమైన ఆదేశాలు జారీ చేసింది. హైకోర్టుల్లో తీర్పుల రిజర్వేషన్ తర్వాత కూడా జాప్యాలు ఎక్కువగా జరుగుతున్న నేపథ్యంలో సీజేఐ జస్టిస్ సూర్యకాంత్ నేతృత్వంలోని ధర్మాసనం ఈ ముఖ్యమైన మార్గదర్శకాలను ఇచ్చింది.

ఈ ధర్మాసనంలో జస్టిస్ జోయ్‌మాల్య బాగ్చీ, జస్టిస్ విపిన్ పంచోలి కూడా ఉన్నారు. అత్యున్నత న్యాయస్థానం హైకోర్టులకు జారీ చేసిన ముఖ్య మార్గదర్శకాలు:

వ్యక్తిగత స్వేచ్ఛ సంబంధిత కేసుల్లో మూడు నెలల కంటే ముందే తీర్పులు ఇవ్వాలి.

బెయిల్ దరఖాస్తులపై అదే రోజు తీర్పు ఇవ్వడం ఉత్తమం. రిజర్వ్ చేస్తే మరుసటి రోజు వెలువరించాలి.

బెయిల్ తీర్పు వెలువడిన రోజునే జైలు అధికారులకు ఆర్డర్లు పంపించాలి.

బెయిల్ లభించిన ఖైదీలను అదే రోజు లేదా మరుసటి రోజు విడుదల చేయాలి.

తీర్పులో అమలు భాగాన్ని మాత్రమే ఓపెన్ కోర్టులో ప్రకటించాలి. పూర్తి తీర్పు (కారణాలతో సహా) ఏడు రోజుల్లో హైకోర్టు వెబ్‌సైట్‌లో అప్‌లోడ్ చేయాలి.

తీర్పు రిజర్వ్ చేసిన మూడు నెలల్లో వెలువరించకపోతే రిజిస్ట్రార్ జనరల్ విషయాన్ని చీఫ్ జస్టిస్ దృష్టికి తీసుకెళ్లాలి. చీఫ్ జస్టిస్ రెండు వారాల అదనపు సమయం ఇవ్వవచ్చు. అప్పటికీ తీర్పు రాకపోతే కేసును మరో బెంచ్‌కు బదిలీ చేయాలి.

వాదనలు ముగిసి తీర్పు తేదీ రిజర్వ్ చేస్తే దానిని హైకోర్టు వెబ్‌సైట్‌లో స్పష్టంగా ప్రకటించాలి.

ఈ మార్గదర్శకాలు అమలు కోసం హైకోర్టులు తమ వెబ్‌సైట్‌లలో తగిన మార్పులు చేయాలని సుప్రీం కోర్టు సూచించింది. 2025లో ఝార్ఖండ్ హైకోర్టు తీర్పు వెబ్‌సైట్‌లో అప్‌లోడ్ చేయడంపై వచ్చిన ఒక పిటిషన్ విచారణలో భాగంగా ఈ ఆదేశాలు వెలువడ్డాయి.

ఈ నిర్ణయం న్యాయ వ్యవస్థలో తీర్పుల జాప్యాలను తగ్గించి, న్యాయం సకాలంలో లభించే వాతావరణాన్ని సృష్టించడంలో కీలక పాత్ర పోషించనుంది.