India–EU Trade Agreement: భారత్-ఈయూ వాణిజ్య ఒప్పందం: స్వర్ణయుగానికి శ్రీకారం

India–EU Trade Agreement: భారత్, ఐరోపా కూటమి (ఈయూ) మధ్య కుదిరిన స్వేచ్ఛా వాణిజ్య ఒప్పందం (ఎఫ్‌టీఏ) రెండు పక్షాలకూ స్వర్ణ యుగాన్ని తెరిచిందని ప్రధాని నరేంద్ర మోదీ పేర్కొన్నారు. ఈ ఒప్పందం భారత్‌తో పాటు ఈయూలోని దేశాలకు భారీ ఆర్థిక ప్రయోజనాలను అందిస్తుందని ఆయన విశ్వాసం వ్యక్తం చేశారు.

ఏఐ ఇంపాక్ట్ సమిట్‌కు హాజరైన ఏడుగురు విదేశీ నేతలు, ఇద్దరు ప్రముఖ సీఈవోలతో బుధవారం దిల్లీలో ప్రధాని మోదీ ద్వైపాక్షిక చర్చలు జరిపారు. ఈ సమావేశాల్లో రక్షణ, టెక్నాలజీ, వాణిజ్యం, పెట్టుబడులు, పునరుత్పాదక ఇంధనం వంటి రంగాల్లో సహకారాన్ని మరింత బలోపేతం చేసుకునే అంశాలపై లోతైన చర్చ జరిగింది.

స్పెయిన్ ప్రధాని పెడ్రో శాంచెజ్‌తో జరిగిన భేటీలో రక్షణ, భద్రత, టెక్నాలజీ రంగాల్లో సహకారం పెంచుకోవాలని నిర్ణయించారు. 2026ను భారత్-స్పెయిన్ సాంస్కృతిక, పర్యాటక, ఏఐ సంవత్సరంగా గుర్తించనున్నట్లు ప్రకటించారు. ఎఫ్‌టీఏ ద్వారా రెండు దేశాల మధ్య ఆర్థిక బంధాలు మరింత బలపడతాయని, ప్రజలకు కొత్త అవకాశాలు లభిస్తాయని మోదీ తెలిపారు.

ఫిన్లాండ్ ప్రధాని పెటెరి ఆర్పోతో చర్చల్లో ఎఫ్‌టీఏకు మద్దతిచ్చినందుకు కృతజ్ఞతలు తెలిపిన మోదీ, రెండు దేశాల మధ్య వాణిజ్యాన్ని రెట్టింపు చేసుకోవాలని అంగీకరించారు. 6జీ, ఆవిష్కరణలు, శుద్ధ ఇంధనం, బయో ఇంధనాలు, సర్క్యులర్ ఆర్థిక వ్యవస్థలపై సహకారం పెంచుకోవాలని నిర్ణయించారు.

సెర్బియా అధ్యక్షుడు అలెగ్జాండర్ ఉసిక్‌తో రక్షణ, తయారీ, ఎరువులు, మౌలిక వసతుల రంగాల్లో సహకారాన్ని బలోపేతం చేసుకోవాలని అంగీకరించారు. భారత్ తమకు విశ్వసనీయ భాగస్వామి అని ఉసిక్ పేర్కొన్నారు.

క్రోయేషియా ప్రధాని ఆండ్రెజ్ ప్లెంకోవిక్‌తో టెక్నాలజీ, ఆవిష్కరణలు, నౌకా నిర్మాణం, బ్లూ ఎకానమీ, లాజిస్టిక్స్, డిజిటల్ ట్రాన్స్‌ఫార్మేషన్, రక్షణ రంగాల్లో సహకారం పెంచుకోవాలని చర్చించారు.

ఎస్తోనియా అధ్యక్షుడు అలార్ కరిస్‌తో టెక్నాలజీ, ఇంధన నిర్వహణ, నైపుణ్య రంగాల్లో కలిసి పనిచేయాలని నిర్ణయించారు.

కజకిస్థాన్ ప్రధాని ఓల్జాస్ బెక్తెనోవ్‌తో వాణిజ్యం, ఇంధనం, కీలక ఖనిజాలు, రక్షణ రంగాల్లో సహకార అవకాశాలను చర్చించారు.

భూటాన్ ప్రధాని షెరింగ్ తాబ్గేతో పరస్పర విశ్వాసం, గుడ్‌విల్ ఆధారంగా బంధాలు కొనసాగుతున్నాయని మోదీ పేర్కొన్నారు.

గూగుల్ సీఈవో సుందర్ పిచాయ్, సన్ మైక్రోసిస్టమ్స్ సహ వ్యవస్థాపకుడు వినోద్ ఖోస్లాతో కూడా ప్రధాని భేటీ అయ్యారు.

ఏఐ ఇంపాక్ట్ సమిట్ సందర్భంగా ప్రపంచ నేతలకు ప్రధాని మోదీ ఘన స్వాగతం పలికి, విందు ఇచ్చారు. ఐక్యరాజ్యసమితి ప్రధాన కార్యదర్శి ఆంటోనియో గుటెరస్, ఐఎంఎఫ్ చీఫ్ క్రిస్టాలినా జార్జీవా తదితరులు ఈ కార్యక్రమంలో పాల్గొన్నారు.

ఈ ఒప్పందం, ద్వైపాక్షిక భేటీలతో భారత్ అంతర్జాతీయ సంబంధాల్లో కీలక మలుపు తిరిగిందని విశ్లేషకులు అభిప్రాయపడుతున్నారు.